ಬೊಗೋಟಾ, ಏ. 26: ಕೊಲಂಬಿಯಾದಲ್ಲಿ ಸಂಭವಿಸಿದ ಭೀಕರ ಬಾಂಬ್ ಸ್ಫೋಟದಲ್ಲಿ ಬಸ್ನಲ್ಲಿ ಪ್ರಯಾಣಿಸುತ್ತಿದ್ದ 13 ಮಂದಿ ಸಾವನ್ನಪ್ಪಿದ್ದು, ಕನಿಷ್ಠ 38 ಮಂದಿ ಗಾಯಗೊಂಡಿದ್ದಾರೆ. ಈ ದಾಳಿ ಹೆಚ್ಚುತ್ತಿರುವ ಮಾದಕ ವಸ್ತುಗಳ ಕಳ್ಳಸಾಗಣೆ ಸಂಬಂಧಿತ ಹಿಂಸಾಚಾರದ ಭಾಗವಾಗಿದ್ದು, ದೇಶದ ಸೇನಾ ಮುಖ್ಯಸ್ಥರು ಇದನ್ನು ಭಯೋತ್ಪಾದಕ ಕೃತ್ಯವೆಂದು ಬಣ್ಣಿಸಿದ್ದಾರೆ.
ಕೌಕಾ ಪ್ರಾಂತ್ಯದ ಗವರ್ನರ್ ಆಕ್ಟಾವಿಯೊ ಗುಜ್ಮನ್ ಅವರು ಎಕ್ಸ್ (X) ನಲ್ಲಿ ತಿಳಿಸಿದಂತೆ, ಕಾಜಿಬಿಯೊ ಪಟ್ಟಣದ ಪಾನ್-ಅಮೆರಿಕನ್ ಹೆದ್ದಾರಿಯಲ್ಲಿ ಸಾಗುತ್ತಿದ್ದ ಬಸ್ ಮೇಲೆ ಸ್ಫೋಟಕ ಸಾಧನವನ್ನು ಸಿಡಿಸಲಾಗಿದೆ ಎಂದು ತಿಳಿಸಲಾಗಿದೆ. ಗಾಯಗೊಂಡವರಲ್ಲಿ ಐದು ಮಕ್ಕಳು ಸೇರಿದ್ದಾರೆ ಎಂದು ಕೌಕಾ ಆರೋಗ್ಯ ಕಾರ್ಯದರ್ಶಿ ಕ್ಯಾರೋಲಿನಾ ಕಾಮಾಗೊ ಸ್ಥಳೀಯ ಟಿವಿ ಚಾನೆಲ್ಗೆ ತಿಳಿಸಿದ್ದಾರೆ.
ಕೊಲಂಬಿಯಾದ ಸಶಸ್ತ್ರ ಪಡೆಗಳ ಕಮಾಂಡರ್ ಜನರಲ್ ಹುಗೋ ಲೋಪೆಜ್ ಅವರು ಈ ದಾಳಿಗೆ ಇವಾನ್ ಮೊರ್ದಿಸ್ಕೊ ಎಂಬ ಅತಿ ದೊಡ್ಡ ಅಪರಾಧಿಯ ನೆಟ್ವರ್ಕ್ ಹಾಗೂ ಜೈಮೆ ಮಾರ್ಟಿನೆಜ್ ಘಟಕ ಹೊಣೆ ಎಂದು ಆರೋಪಿಸಿದ್ದಾರೆ. ಈ ಗುಂಪುಗಳು 2016ರಲ್ಲಿ ಸರ್ಕಾರದೊಂದಿಗೆ ಒಪ್ಪಂದ ಮಾಡಿಕೊಂಡ ನಂತರವೂ ಶಾಂತಿ ಒಪ್ಪಂದವನ್ನು ಪಾಲಿಸದ ಫಾರ್ಕ್ (FARC) ಸಂಘಟನೆಯ ಭಿನ್ನಮತೀಯ ಗುಂಪುಗಳಾಗಿವೆ.
ರಾಷ್ಟ್ರಪತಿ ಗುಸ್ಟಾವೊ ಪೆಟ್ರೋ ಅವರು ದಾಳಿಯನ್ನು ಖಂಡಿಸಿ, ಈ ದಾಳಿಗೆ ಕಾರಣರಾದವರು ಭಯೋತ್ಪಾದಕರು, ಫಾಸಿಸ್ಟ್ಗಳು ಹಾಗೂ ಮಾದಕ ವಸ್ತು ವ್ಯಾಪಾರಿಗಳು ಎಂದು ಹೇಳಿದ್ದಾರೆ. ಈ ದಾಳಿ ಇತ್ತೀಚೆಗೆ ಆ ಪ್ರದೇಶದಲ್ಲಿ ನಡೆದ ಸರಣಿ ಸ್ಫೋಟಗಳ ಭಾಗವಾಗಿದೆ. ಕಳೆದ ಎರಡು ದಿನಗಳಲ್ಲಿ ಕನಿಷ್ಠ 26 ಘಟನೆಗಳು ನಡೆದಿದ್ದು, ಅವು ಸಾಮಾನ್ಯ ನಾಗರಿಕರನ್ನು ಗುರಿಯಾಗಿಸಿಕೊಂಡಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇವುಗಳಲ್ಲಿ ಜಮುಂಡಿ ಗ್ರಾಮೀಣ ಪ್ರದೇಶದ ಪೊಲೀಸ್ ಠಾಣೆಯ ಮೇಲೆ ಗುಂಡಿನ ದಾಳಿ ಮತ್ತು ಎಲ್ ಟಾಂಬೊದಲ್ಲಿನ ನಾಗರಿಕ ವಿಮಾನಯಾನ ರೇಡಾರ್ ಕೇಂದ್ರದ ಮೇಲೆ ದಾಳಿ ಸೇರಿವೆ. ಅಲ್ಲದೆ, ಸ್ಫೋಟಕಗಳಿಂದ ತುಂಬಿದ್ದ ಮೂರು ಡ್ರೋನ್ಗಳನ್ನು ಭದ್ರತಾ ಪಡೆಗಳು ನಿಷ್ಕ್ರಿಯಗೊಳಿಸಿದ್ದವು.
ಈ ಪ್ರದೇಶದಲ್ಲಿ ಹಿಂಸಾಚಾರ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ರಕ್ಷಣಾ ಸಚಿವ ಪೆಡ್ರೊ ಸ್ಯಾಂಚೆಜ್ ನೇತೃತ್ವದಲ್ಲಿ ಉನ್ನತ ಮಟ್ಟದ ಅಧಿಕಾರಿಗಳು ಸಭೆ ನಡೆಸುತ್ತಿದ್ದರು. ಇದೇ ವೇಳೆ ಈ ಭೀಕರ ಸ್ಫೋಟ ಸಂಭವಿಸಿತು. ವ್ಯಾಲ್ಲೆ ಡೆಲ್ ಕೌಕಾ ಪ್ರಾಂತ್ಯದ ಗವರ್ನರ್ ಫ್ರಾನ್ಸಿಸ್ಕಾ ಟೊರೊ ಅವರು ತಕ್ಷಣದ ಭದ್ರತಾ ನೆರವು ನೀಡುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
ಇದಲ್ಲದೆ, ಮರ್ಲಾನ್ ಎಂಬ ಗುಂಪಿನ ನಾಯಕನ ಬಂಧನಕ್ಕೆ ಮಾಹಿತಿ ನೀಡುವವರಿಗೆ 1 ಮಿಲಿಯನ್ ಡಾಲರ್ಗೂ ಅಧಿಕ ಬಹುಮಾನ ಘೋಷಿಸಲಾಗಿದೆ. ಕಾಲಿ ಮತ್ತು ಪಾಲ್ಮಿರಾ ದಾಳಿಗಳ ಹಿಂದೆ ಇರುವವರ ಮಾಹಿತಿ ನೀಡುವವರಿಗೆ 14,000 ಡಾಲರ್ ಬಹುಮಾನವನ್ನೂ ಘೋಷಿಸಲಾಗಿದೆ.