ನವದೆಹಲಿ, ಅ. 27- ಮುಂಬೈ ಮತ್ತು ಅಹಮದಾಬಾದ್‌ಗೆ ಸಂಪರ್ಕ ಕಲ್ಪಿಸುವ ಬುಲೆಟ್ ರೈಲು ಯೋಜನೆಯನ್ನು ಮುಂದಿನ ವರ್ಷ ಉದ್ಘಾಟಿಸಲಾಗುವುದು ಎಂದು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್‌ ಖಚಿತಪಡಿಸಿದ್ದಾರೆ. ವೈಷ್ಣವ್‌ ಅವರು ನಿರ್ದಿಷ್ಟ ದಿನಾಂಕವನ್ನು ಉಲ್ಲೇಖಿಸದಿದ್ದರೂ, ಮುಂದಿನ ವರ್ಷದ ವೇಳೆಗೆ ಈ ಯೋಜನೆಯು ಉದ್ಘಾಟನೆಗೆ ಸಿದ್ಧವಾಗಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.
ಜಪಾನ್‌ನ ಮಾಜಿ ನ್ಯಾಯ ಸಚಿವ ಹಿಡೆಕಿ ಮಕಿಹಾರಾ ಅವರು ಈ ಯೋಜನೆಯ ಕುರಿತು ವ್ಯಕ್ತಪಡಿಸಿದ ಟೀಕೆಗಳ ಬಗ್ಗೆಯೂ ಅವರು ಮಾತನಾಡಿದರು. ಈ ವರ್ಷದ ಆರಂಭದಲ್ಲಿ ಹಿಡೆಕಿ ಮಕಿಹಾರಾ ಅವರು ಹೈಸ್ಪೀಡ್‌ ರೈಲು ಯೋಜನೆಯಲ್ಲಿನ ವಿಳಂಬಕ್ಕಾಗಿ ಭಾರತ ಸರ್ಕಾರವನ್ನು ತೀವ್ರವಾಗಿ ಟೀಕಿಸಿದ್ದರು ಮತ್ತು ಸರ್ಕಾರವು ಪದೇಪದೇ ನೀಡಿದ ಭರವಸೆಗಳನ್ನು ಮುರಿದಿದೆ ಎಂದು ಆರೋಪಿಸಿದ್ದರು.
ಅವರ ಆರೋಪಗಳನ್ನು ಭಾರತ ಸರ್ಕಾರ ತಳ್ಳಿಹಾಕಿದೆ. ಈ ಹೇಳಿಕೆಗಳ ಕುರಿತು ಪ್ರತಿಕ್ರಿಯಿಸಿದ ಅಶ್ವಿನಿ ವೈಷ್ಣವ್‌, ಜಪಾನ್‌ನೊಂದಿಗೆ ಭಾರತ ಹೊಂದಿರುವ ಕಾರ್ಯತಂತ್ರದ ಸಂಬಂಧವನ್ನು ಒತ್ತಿಹೇಳಿದರು. ಬುಲೆಟ್ ರೈಲು ಯೋಜನೆಯು ಜಪಾನ್‌ನ ಭೂಮಿ, ಮೂಲಸೌಕರ್ಯ ಮತ್ತು ಸಾರಿಗೆ ಸಚಿವಾಲಯದ ವ್ಯಾಪ್ತಿಗೆ ಬರುತ್ತದೆ ಎಂದು ಅವರು ವಿವರಿಸಿದರು.
ಒಂದೂವರೆ ವರ್ಷದ ಹಿಂದೆ ಈ ಯೋಜನೆಗೆ ಭೇಟಿ ನೀಡಿದ್ದ, ಅಂದಿನ ಸಚಿವಾಲಯದ ಉಸ್ತುವಾರಿ ಸಚಿವರಾಗಿದ್ದ ನಕಾನೊ ಹಿರೊಮಾಸಾ ಅವರು ಯೋಜನೆಯನ್ನು ಕಂಡು ಬಹಳ ಪ್ರಭಾವಿತರಾಗಿದ್ದರು ಎಂದು ವೈಷ್ಣವ್‌ ತಿಳಿಸಿದರು. ಕೆಲಸದ ಗುಣಮಟ್ಟ ಮತ್ತು ಯೋಜನೆಯನ್ನು ಕಾರ್ಯಗತಗೊಳಿಸುತ್ತಿರುವ ವೇಗವನ್ನು ಕಂಡು ಅಂದಿನ ಸಚಿವರು ಅತ್ಯಂತ ಪ್ರಭಾವಿತರಾಗಿದ್ದರು ಎಂದು ವೈಷ್ಣವ್‌ ನೆನಪಿಸಿಕೊಂಡರು.
ಈ ಹೈಸ್ಪೀಡ್‌ ರೈಲು ಯೋಜನೆಯಲ್ಲಿ ತೊಡಗಿಸಿಕೊಂಡಿರುವ ಜಪಾನಿನ ಎಂಜಿನಿಯರ್‌ಗಳು, ಇಲ್ಲಿ ಬಳಸಲಾದ ಕೆಲವು ತಂತ್ರಜ್ಞಾನಗಳನ್ನು ತಮ್ಮ ಮುಂದಿನ ಬುಲೆಟ್ ರೈಲು ಯೋಜನೆಗಳಲ್ಲಿಯೂ ಅಳವಡಿಸಿಕೊಳ್ಳುವುದಾಗಿ ಹೇಳಿದ್ದಾರೆ ಎಂದು ಕೇಂದ್ರ ಸಚಿವರು ತಿಳಿಸಿದರು.
ಅಲ್ಲದೆ, ಈ ಹಿಂದೆ ಶೃಂಗಸಭೆಯೊಂದರಲ್ಲಿ ಪಾಲ್ಗೊಳ್ಳಲು ಭಾರತಕ್ಕೆ ಭೇಟಿ ನೀಡಿದ್ದ ಅಂತರರಾಷ್ಟ್ರೀಯ ಹೈಸ್ಪೀಡ್‌ ರೈಲು ಸಂಘದ ಅಧ್ಯಕ್ಷರು, ಜಪಾನ್‌ ಕೂಡ ಇಷ್ಟು ಕಡಿಮೆ ಅವಧಿಯಲ್ಲಿ ಇಂತಹ ಯೋಜನೆಯನ್ನು ಪೂರ್ಣಗೊಳಿಸಲು ಸಾಧ್ಯವಾಗುತ್ತಿರಲಿಲ್ಲ ಎಂದು ಹೇಳಿದ್ದನ್ನು ಅವರು ಉಲ್ಲೇಖಿಸಿದರು.
ಯೋಜನೆ ವಿಳಂಬವಾಗಲು ಕಾರಣವೇನು?
2017ರಲ್ಲಿ ಈ ಯೋಜನೆಗೆ ಅಡಿಪಾಯ ಹಾಕಲಾಗಿದ್ದರೂ, ವಿನ್ಯಾಸದ ಕೆಲಸ ಅತ್ಯಂತ ಸಂಕೀರ್ಣವಾಗಿದ್ದರಿಂದ ಅದನ್ನು ಪೂರ್ಣಗೊಳಿಸಲು ಒಂದೂವರೆ ವರ್ಷದಿಂದ ಎರಡು ವರ್ಷಗಳವರೆಗೆ ಬೇಕಾಯಿತು ಎಂದು ಕೇಂದ್ರ ಸಚಿವರು ತಿಳಿಸಿದರು.
ಕೋವಿಡ್‌ ಸಾಂಕ್ರಾಮಿಕದಿಂದಲೂ ಯೋಜನೆ ವಿಳಂಬವಾಯಿತು ಎಂದು ಅವರು ಹೇಳಿದರು. ನಂತರದ ದಿನಗಳಲ್ಲಿ ಮಹಾರಾಷ್ಟ್ರದ ಅಂದಿನ ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆ ಅವರು ರಾಜ್ಯದಲ್ಲಿ ಬುಲೆಟ್ ರೈಲು ಮಾರ್ಗದ ಕಾಮಗಾರಿ ಮುಂದುವರಿಯದಂತೆ ನಿರ್ಧರಿಸಿದ್ದರು ಎಂದು ವೈಷ್ಣವ್‌ ವಿವರಿಸಿದರು.