ನವದೆಹಲಿ,ನ.12-ಮುಂಬರುವ 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗೆ ಮುನ್ನ ರಾಜ್ಯ ರಾಜಕೀಯದಲ್ಲಿ ಮಹತ್ವದ ಬೆಳವಣಿಗೆಯೊಂದು ನಡೆದಿದೆ. ಆಲ್‌ ಇಂಡಿಯಾ ಮಜ್ಲಿಸ್‌-ಇ-ಇತ್ತೆಹಾದುಲ್‌ ಮುಸ್ಲಿಮೀನ್‌ ಮತ್ತು ಆಜಾದ್‌ ಸಮಾಜವಾದಿ ಪಕ್ಷ ಮೈತ್ರಿ ಮಾಡಿಕೊಳ್ಳಲು ಮುಂದಾಗಿವೆ. ಮೈತ್ರಿಯ ಅಧಿಕೃತ ಘೋಷಣೆ ಹಾಗೂ ಎರಡೂ ಪಕ್ಷಗಳು ಸ್ಪರ್ಧಿಸಲಿರುವ ಕ್ಷೇತ್ರಗಳ ವಿವರಗಳನ್ನು ಗುರುವಾರ ಲಕ್ನೋದಲ್ಲಿ ನಡೆಯಲಿರುವ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಪ್ರಕಟಿಸುವ ಸಾಧ್ಯತೆಯಿದೆ.
ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್‌ ಓವೈಸಿ ಹಾಗೂ ಎಎಸ್‌‍ಪಿ ಮುಖ್ಯಸ್ಥ, ನಗೀನಾ ಸಂಸದ ಚಂದ್ರಶೇಖರ್‌ ಆಜಾದ್‌ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮೈತ್ರಿಯ ರೂಪುರೇಷೆಗಳನ್ನು ಪ್ರಕಟಿಸಲಿದ್ದಾರೆ. ಎಐಎಂಐಎಂ ವಕ್ತಾರ ಶಾದಾಬ್‌ ಚೌಹಾಣ್‌ ಪ್ರಕಾರ, ಪಶ್ಚಿಮ ಉತ್ತರ ಪ್ರದೇಶ ಮತ್ತು ರೋಹಿಲ್‌ಖಂಡ್‌ನ ಮುಸ್ಲಿಂ ಹಾಗೂ ದಲಿತ ಮತದಾರರ ಪ್ರಾಬಲ್ಯವಿರುವ ಕ್ಷೇತ್ರಗಳಿಗೆ ಮೈತ್ರಿಗೆ ಹೆಚ್ಚಿನ ಆದ್ಯತೆ ನೀಡಲಿದೆ.
ಮುಸ್ಲಿಂ ಮತ್ತು ದಲಿತ ಸಮುದಾಯಗಳ ರಾಜಕೀಯ ಹಕ್ಕುಗಳ ವಿಚಾರವನ್ನು ಮುಂದಿಟ್ಟುಕೊಂಡು ಚುನಾವಣಾ ಕಣಕ್ಕಿಳಿಯುವುದಾಗಿ ಮೈತ್ರಿಕೂಟ ಹೇಳಿಕೊಂಡಿದೆ. ಚುನಾವಣೆ ಸಮೀಪಿಸುತ್ತಿದ್ದಂತೆ ಇನ್ನೂ ಕೆಲವು ಸಣ್ಣ ಪಕ್ಷಗಳು ಮೈತ್ರಿಕೂಟಕ್ಕೆ ಸೇರುವ ಸಾಧ್ಯತೆಯನ್ನೂ ಚೌಹಾಣ್‌ ಸೂಚಿಸಿದ್ದಾರೆ.
ಈ ಮೈತ್ರಿಯಿಂದ ಸಮಾಜವಾದಿ ಪಕ್ಷದ ಅಲ್ಪಸಂಖ್ಯಾತ ಮತಬ್ಯಾಂಕ್‌ಗೆ ಹಿನ್ನಡೆಯಾಗಬಹುದೇ ಎಂಬ ಚರ್ಚೆ ಈಗಾಗಲೇ ಆರಂಭವಾಗಿದೆ. ವಿಶೇಷವಾಗಿ ಮುಸ್ಲಿಂ ಮತ್ತು ದಲಿತ ಮತಗಳು ವಿಭಜನೆಯಾದರೆ, ಅದರ ಪರೋಕ್ಷ ಲಾಭ ಬಿಜೆಪಿಗೆ ದೊರೆಯಬಹುದು ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
ಎಸ್‌‍ಪಿ ಮುಖ್ಯಸ್ಥ ಅಖಿಲೇಶ್‌ ಯಾದವ್‌, ಈ ಬಾರಿ ಉತ್ತರ ಪ್ರದೇಶದ ಜನರು ಸಮಾಜವಾದಿ ಪಕ್ಷದ ಪರವಾಗಿ ತಮ ಮನಸ್ಸು ಮಾಡಿದ್ದಾರೆ ಎಂದು ಪ್ರತಿಕ್ರಿಯಿಸಿದ್ದಾರೆ. ಮತ್ತೊಂದೆಡೆ, ಬಿಜೆಪಿ ನಾಯಕರು ಎಲ್ಲಾ ಪಕ್ಷಗಳಿಗೂ ತಮಗೆ ಬೇಕಾದ ಕ್ಷೇತ್ರಗಳಲ್ಲಿ ಸ್ಪರ್ಧಿಸುವ ಸ್ವಾತಂತ್ರ್ಯವಿದೆ ಎಂದು ಹೇಳಿದ್ದಾರೆ. ಆದರೆ ಎಐಎಂಐಎಂ ಮುಖ್ಯಸ್ಥ ಓವೈಸಿ ವಿರುದ್ಧ ಬಿಜೆಪಿ ತೀವ್ರ ಟೀಕೆ ಮಾಡಿದೆ.
ಹಿಂದಿನ ಚುನಾವಣೆಯಲ್ಲೂ ಸೀಮಿತ ಪ್ರಭಾವ
2022ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯಲ್ಲಿ ಎಐಎಂಐಎಂ 95 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿ ಸುಮಾರು ಶೇ.0.49ರಷ್ಟು ಮತ ಗಳಿಸಿದ್ದರೂ ಯಾವುದೇ ಕ್ಷೇತ್ರದಲ್ಲಿ ಗೆಲುವು ಸಾಧಿಸಿರಲಿಲ್ಲ. ಎಎಸ್‌‍ಪಿ ಕೂಡ 100ಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ಸ್ಪರ್ಧಿಸಿ ಸುಮಾರು ಶೇ.0.13ರಷ್ಟು ಮತ ಗಳಿಸಿತ್ತು.
ಆದರೆ 2025ರ ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಎಐಎಂಐಎಂ ಎಎಸ್‌‍ಪಿ ಸೇರಿದಂತೆ ರೂಪುಗೊಂಡಿದ್ದ ಗ್ರ್ಯಾಂಡ್‌ ಡೆಮಾಕ್ರಟಿಕ್‌ ಅಲೈಯನ್‌್ಸನಲ್ಲಿ ಎಐಎಂಐಎಂ 28 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿ ಐದು ಸ್ಥಾನಗಳನ್ನು ಗೆದ್ದಿತ್ತು. ಈ ಗೆಲುವುಗಳು ಮುಸ್ಲಿಂ ಬಹುಸಂಖ್ಯಾತ ಸೀಮಾಂಚಲ್‌ ಪ್ರದೇಶದಲ್ಲಿ ದಾಖಲಾಗಿದ್ದವು. ಎಎಸ್‌‍ಪಿ 18 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದರೂ ಯಾವುದೇ ಸ್ಥಾನ ಗೆಲ್ಲಲು ಸಾಧ್ಯವಾಗಿರಲಿಲ್ಲ.
ಉತ್ತರ ಪ್ರದೇಶದಲ್ಲಿ ಮುಸ್ಲಿಂ ಜನಸಂಖ್ಯೆ ಸುಮಾರು ಶೇ.19 ಹಾಗೂ ದಲಿತ ಜನಸಂಖ್ಯೆ ಸುಮಾರು ಶೇ.21ರಷ್ಟಿದೆ ಎಂಬ ಅಂದಾಜಿದೆ. ಹೀಗಾಗಿ ಎರಡೂ ಸಮುದಾಯಗಳ ಮತಗಳನ್ನು ಒಗ್ಗೂಡಿಸುವ ಉದ್ದೇಶದೊಂದಿಗೆ ಎಐಎಂಐಎಂ-ಎಎಸ್‌‍ಪಿ ಮೈತ್ರಿ ರೂಪುಗೊಂಡಿರುವುದು ಚುನಾವಣಾ ಲೆಕ್ಕಾಚಾರದಲ್ಲಿ ಮಹತ್ವ ಪಡೆದುಕೊಂಡಿದೆ.
ಇದೀಗ ಈ ಮೈತ್ರಿ ನಿಜವಾಗಿಯೂ ಎಸ್‌‍ಪಿಯ ಮತಬ್ಯಾಂಕ್‌ಗೆ ಎಷ್ಟು ಹೊಡೆತ ನೀಡಲಿದೆ, ಎಷ್ಟು ಕ್ಷೇತ್ರಗಳಲ್ಲಿ ನೇರ ಸ್ಪರ್ಧೆ ನೀಡಲಿದೆ ಮತ್ತು ಅದರ ಪರಿಣಾಮ ಬಿಜೆಪಿಎಸ್‌‍ಪಿ ನಡುವಿನ ಪ್ರಮುಖ ಚುನಾವಣಾ ಸಮೀಕರಣದ ಮೇಲೆ ಹೇಗಿರಲಿದೆ ಎಂಬುದು 2027ರ ಉತ್ತರ ಪ್ರದೇಶ ಚುನಾವಣೆಯ ಪ್ರಮುಖ ಕುತೂಹಲಗಳಲ್ಲಿ ಒಂದಾಗಿದೆ.