ನವದೆಹಲಿ, ಏ.28: ಭಾರತದ ಮೋಸ್ಟ್ ವಾಂಟೆಡ್ ಭೂಗತ ಅಪರಾಧಿ ಹಾಗೂ ಅಂತರರಾಷ್ಟ್ರೀಯ ಮಾದಕ ವಸ್ತು ಜಾಲದ ಪ್ರಮುಖ ಕಿಂಗ್ಪಿನ್ ಸಲೀಂ ಡೋಲಾನನ್ನು ಭಾರತಕ್ಕೆ ಗಡೀಪಾರು ಮಾಡಲಾಗಿದೆ. ಈತನು ದಾವೂದ್ ಇಬ್ರಾಹಿಂನ ಆಪ್ತ ಸಹಚರನಾಗಿದ್ದಾನೆ ಎಂಬುದು ಗಮನಾರ್ಹ.
ಇಸ್ತಾಂಬುಲ್ನಲ್ಲಿ ನಡೆದ ಉನ್ನತ ಮಟ್ಟದ ಜಂಟಿ ಕಾರ್ಯಾಚರಣೆಯಲ್ಲಿ ಟರ್ಕಿಯ ಗುಪ್ತಚರ ಸಂಸ್ಥೆ ಹಾಗೂ ಸ್ಥಳೀಯ ಪೊಲೀಸರ ತಂಡ ಡೋಲಾನನ್ನು ಬಂಧಿಸಿತು. ಇಂಟರ್ಪೋಲ್ನ ರೆಡ್ ಕಾರ್ನರ್ ನೋಟೀಸ್ ಆಧಾರವಾಗಿ ಈ ಬಂಧನ ನಡೆದಿದ್ದು, ಬಂಧನದ ಒಂದು ದಿನದ ಬಳಿಕವೇ ಆತನನ್ನು ಭಾರತಕ್ಕೆ ಗಡೀಪಾರು ಮಾಡಲಾಗಿದೆ.
ಮುಂಜಾನೆ ವಿಶೇಷ ವಿಮಾನದ ಮೂಲಕ ಡೋಲಾನನ್ನು ದೆಹಲಿ ವಿಮಾನ ನಿಲ್ದಾಣಕ್ಕೆ ಕರೆತರಲಾಗಿದ್ದು, ಪ್ರಾಥಮಿಕ ವಿಚಾರಣೆಯ ನಂತರ ಹೆಚ್ಚಿನ ತನಿಖೆಗಾಗಿ ಮುಂಬೈ ಪೊಲೀಸರಿಗೆ ಹಸ್ತಾಂತರಿಸುವ ಸಾಧ್ಯತೆ ಇದೆ. ಅಧಿಕಾರಿಗಳು ಈಗಾಗಲೇ ಜಾಗತಿಕ ಮಾದಕ ವಸ್ತು ಜಾಲಗಳೊಂದಿಗಿನ ಆತನ ಸಂಪರ್ಕಗಳ ಬಗ್ಗೆ ವಿಚಾರಣೆ ಆರಂಭಿಸಿದ್ದಾರೆ.
ಮುಂಬೈನ ಕುರ್ಲಾ ಪ್ರದೇಶದಲ್ಲಿ ಬಂಧಿತಗೊಂಡ ಆತನ ಸಹಚರರು, ಡೋಲಾದಿಂದಲೇ ನಿರ್ದೇಶನ ಪಡೆದಿದ್ದಾಗಿ ಒಪ್ಪಿಕೊಂಡಿದ್ದಾರೆ. ಈ ಸಂಬಂಧ ನಡೆದ ದಾಳಿಗಳಲ್ಲಿ ಸುಮಾರು 126 ಕಿಲೋಗ್ರಾಂ ಮತ್ತು 141 ಗ್ರಾಂ ಮೆಫೆಡ್ರೋನ್ ಜೊತೆಗೆ ₹25.22 ಲಕ್ಷ ನಗದು ವಶಪಡಿಸಿಕೊಳ್ಳಲಾಗಿದೆ.
ರೆಡ್ ಕಾರ್ನರ್ ನೋಟಿಸ್ ಹಿನ್ನೆಲೆ
ಇಂಟರ್ಪೋಲ್ ಹೊರಡಿಸಿದ ರೆಡ್ ಕಾರ್ನರ್ ನೋಟಿಸ್ ಪ್ರಕಾರ, ಸಲೀಂ ಡೋಲಾ ಮೇಲೆ ಮಾದಕ ದ್ರವ್ಯಗಳು ಮತ್ತು ಮನೋವಿಕೃತ ವಸ್ತುಗಳ ಕಾಯ್ದೆ, 1985 (NDPS Act) ಅಡಿಯಲ್ಲಿ ಹಲವು ಗಂಭೀರ ಆರೋಪಗಳಿವೆ. ಈ ಕಾಯ್ದೆಯಡಿ ಅಪರಾಧ ಸಾಬೀತಾದರೆ ಕನಿಷ್ಠ 10 ವರ್ಷಗಳ ಶಿಕ್ಷೆ ವಿಧಿಸಲಾಗುತ್ತದೆ ಮತ್ತು ಜಾಮೀನು ಪಡೆಯುವುದು ಕಠಿಣ.
ಸಲೀಂ ಡೋಲಾ ಯಾರು?
ಸಲೀಂ ಡೋಲಾ ಮುಂಬೈನ ಘೋಡಪ್ಡಿಯೋ ಪ್ರದೇಶದ ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿ ಬೈಕುಲ್ಲಾದಲ್ಲಿ ಬೆಳೆದವನು. ಛೋಟಾ ಶಕೀಲ್ನೊಂದಿಗೆ ಸಂಪರ್ಕ ಬೆಳೆಸಿ ಮಾದಕ ವಸ್ತು ವ್ಯವಹಾರಕ್ಕೆ ಪ್ರವೇಶಿಸಿದನು. ಈತನು ದೊಡ್ಡ ಸಿಂಥೆಟಿಕ್ ಡ್ರಗ್ಸ್ ಕಾರ್ಟೆಲ್ನ ಮಾಸ್ಟರ್ಮೈಂಡ್ ಎಂದು ತನಿಖಾಧಿಕಾರಿಗಳು ಶಂಕಿಸುತ್ತಿದ್ದಾರೆ.
2018ರಲ್ಲಿ ಜಾಮೀನು ಪಡೆದು ಯುನೈಟೆಡ್ ಅರಬ್ ಎಮಿರೇಟ್ಸ್ಗೆ ಪಲಾಯನ ಮಾಡಿ, ಅಲ್ಲಿಂದ ಬೇರೆ ಹೆಸರಿನಲ್ಲಿ ತನ್ನ ಜಾಲವನ್ನು ನಡೆಸುತ್ತಿದ್ದನು. ನಂತರ ಟರ್ಕಿಗೆ ತೆರಳಿ ಅಡಗಿಕೊಂಡಿದ್ದಾಗ ಅವನನ್ನು ಬಂಧಿಸಲಾಗಿದೆ.
ಭಾರತ ಮತ್ತು ಟರ್ಕಿ ನಡುವೆ ನೇರ ಹಸ್ತಾಂತರ ಒಪ್ಪಂದವಿಲ್ಲದ ಕಾರಣ, ಯುಎಇ ಮೂಲಕ ಡೋಲಾನನ್ನು ಭಾರತಕ್ಕೆ ತರಲಾಗಿದೆ.
ಈ ಬೆಳವಣಿಗೆ ದಾವೂದ್ ಇಬ್ರಾಹಿಂ ಜಾಲಕ್ಕೆ ದೊಡ್ಡ ಹೊಡೆತ ನೀಡಿದಂತಾಗಿದ್ದು, ಅಂತರರಾಷ್ಟ್ರೀಯ ಮಾದಕ ವಸ್ತು ವ್ಯಾಪಾರ ಜಾಲದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.