ತಿರುಪತಿ, ಅ.13- ತಿರುಮಲ ತಿಮ್ಮಪನ ದರ್ಶನಕ್ಕೆ ಹೊಸದಾಗಿ ತೆರಳುವ ಭಕ್ತರಿಗೆ ಅಲ್ಲಿನ ರಸ್ತೆ, ಕೊಠಡಿಗಳ ಕೌಂಟರ್‌, ಕ್ಯೂ ಲೈನ್‌ಗಳು ಹಾಗೂ ಪ್ರಮುಖ ಸ್ಥಳಗಳ ಬಗ್ಗೆ ಮಾಹಿತಿ ನೀಡುವ ಉದ್ದೇಶದಿಂದ ಮೊಬೈಲ್‌ ಆ್ಯಪ್‌ ಲೋಕಾರ್ಪಣೆ ಮಾಡಲಾಗಿದೆ. ಮೊದಲ ಬಾರಿಗೆ ತಿಮಪ್ಪನ ದರ್ಶನಕ್ಕೆ ಬರುವವರಿಗೆ ಸರಿಯಾದ ಮಾಹಿತಿ ಸಿಗದೆ ಸಾಕಷ್ಟು ತೊಂದರೆ ಅನುಭವಿಸುವುದು ಸಾಮಾನ್ಯ. ಈ ಎಲ್ಲಾ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಒದಗಿಸುವ ಉದ್ದೇಶದಿಂದ ತಿರುಮಲ ತಿರುಪತಿ ದೇವಸ್ಥಾನಂ (ಟಿಟಿಡಿ) ಭಕ್ತರಿಗಾಗಿ ಅತ್ಯಾಧುನಿಕ ವೆಂಕಟಾದ್ರಿ ಮೊಬೈಲ್‌ ಆ್ಯಪ್‌ ಅನ್ನು ಅಧಿಕೃತವಾಗಿ ಲೋಕಾರ್ಪಣೆಗೊಳಿಸಿದೆ.
ಆಂಧ್ರಪ್ರದೇಶ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರು ಈ ನೂತನ ಆ್ಯಪ್‌ ಅನ್ನು ವರ್ಚುವಲ್‌ ಆಗಿ ಉದ್ಘಾಟಿಸಿದರು. ಅಮೆರಿಕದ ಎನ್‌ಆರ್‌ಐ ದಾನಿ ಜೇಪಿ ಅವರ ಆರ್ಥಿಕ ನೆರವಿನೊಂದಿಗೆ ರೂಪುಗೊಂಡಿರುವ ಈ ಆ್ಯಪ್‌, ತಿರುಮಲಕ್ಕೆ ಬರುವ ಪ್ರತಿಯೊಬ್ಬ ಯಾತ್ರಾರ್ಥಿಯ ಪ್ರಯಾಣವನ್ನು ಅತ್ಯಂತ ಸುಲಭಗೊಳಿಸಲಿದೆ.
ಆ್ಯಪ್‌ನಲ್ಲಿ ಲಭ್ಯವಿರುವ ಪ್ರಮುಖ ವೈಶಿಷ್ಟ್ಯಗಳು ಮತ್ತು ತಂತ್ರಜ್ಞಾನ:ಈ ನೂತನ ವೆಂಕಟಾದ್ರಿ ಆ್ಯಪ್‌ ಅತ್ಯಂತ ಆಧುನಿಕ ತಂತ್ರಜ್ಞಾನದೊಂದಿಗೆ ರೂಪಿಸಲಾಗಿದೆ. ತಿರುಮಲದ ಒಟ್ಟು 25 ವಿಭಾಗಗಳಲ್ಲಿ ಬರುವ ಸುಮಾರು 350ಕ್ಕೂ ಹೆಚ್ಚು ಪ್ರಮುಖ ಸ್ಥಳಗಳ ನಿಖರವಾದ ಲೊಕೇಶನ್‌ಗಳನ್ನು ಇದರಲ್ಲಿ ಒದಗಿಸಲಾಗಿದೆ. ಇದರ ವಿಶೇಷತೆಯೆಂದರೆ, ಇಂಟರ್ನೆಟ್‌ ಸಂಪರ್ಕವಿಲ್ಲದೆಯೂ ಕೆಲಸ ಮಾಡುವ ಆಫ್‌ಲೈನ್‌ ನೇವಿಗೇಶನ್‌ ಸೌಲಭ್ಯ ಇದರಲ್ಲಿದೆ.
ಕನ್ನಡ ಸೇರಿದಂತೆ ತೆಲುಗು, ತಮಿಳು, ಹಿಂದಿ ಮತ್ತು ಇಂಗ್ಲಿಷ್‌ ಹೀಗೆ ಒಟ್ಟು 5 ಪ್ರಮುಖ ಭಾಷೆಗಳಲ್ಲಿ ಇದು ಕಾರ್ಯನಿರ್ವಹಿಸುತ್ತದೆ. ಸ್ಮಾರ್ಟ್‌ಫೋನ್‌ ಇಲ್ಲದ ಭಕ್ತರಿಗಾಗಿ ತಿರುಮಲದಾದ್ಯಂತ ವಿಶೇಷ ಡಿಜಿಟಲ್‌ ಕಿಯೋಸ್ಕ್‌ಗಳನ್ನು ಕೂಡ ಸ್ಥಾಪಿಸಲಾಗುತ್ತಿದೆ.
24 ಗಂಟೆಗಳ ಕಾಲ ಕಾರ್ಯನಿರ್ವಹಿಸುವ ವಾಯ್ಸ್ ಅಸಿಸ್ಟೆಂಟ್‌ :ಭಕ್ತರ ಅನುಕೂಲಕ್ಕಾಗಿ ಈ ಆ್ಯಪ್‌ನಲ್ಲಿ ಕೃತಕ ಬುದ್ಧಿಮತ್ತೆ ಆಧಾರಿತ ವಾಯ್‌್ಸ ಅಸಿಸ್ಟೆಂಟ್‌ ಅನ್ನು ನೀಡಲಾಗಿದೆ. ಇದು ದಿನದ 24 ಗಂಟೆಯೂ ಸಕ್ರಿಯವಾಗಿರುತ್ತದೆ. ಭಕ್ತರು ಧ್ವನಿ ಆದೇಶಗಳ ಮೂಲಕ ತಾವು ತಲುಪಬೇಕಾದ ಸ್ಥಳಗಳ ಬಗ್ಗೆ ಕೇಳಿ ತಿಳಿದುಕೊಳ್ಳಬಹುದು. ಅಲ್ಲದೆ, ತಾವು ನಿಲ್ಲಿಸಿದ ವಾಹನವನ್ನು ಸುಲಭವಾಗಿ ಗುರುತಿಸಲು ಮಾರ್ಕ್‌ ಮೈ ಸ್ಪಾಟ್‌ ಎಂಬ ಅತ್ಯುಪಯುಕ್ತ ಫೀಚರ್‌ ಅನ್ನು ಸಹ ಇದರಲ್ಲಿ ಸೇರಿಸಲಾಗಿದೆ.ತಿರುಮಲದಲ್ಲಿ ಭಕ್ತರಿಗೆ ಅಗತ್ಯವಿರುವ ಪ್ರತಿಯೊಂದು ಸೌಲಭ್ಯದ ಸ್ಥಳವನ್ನು ಈ ಆ್ಯಪ್‌ ಮೂಲಕ ಸುಲಭವಾಗಿ ಪತ್ತೆ ಹಚ್ಚಬಹುದು.
ವಸತಿ ಮತ್ತು ದರ್ಶನ:
ರೂಮ್ಸೌ ಅಥವಾ ಕೊಠಡಿಗಳು ಲಭ್ಯವಿರುವ ಕೌಂಟರ್‌ಗಳು ಹಾಗೂ ದರ್ಶನದ ಕ್ಯೂ ಲೈನ್‌ಗಳು.ಅನ್ನಪ್ರಸಾದ ಹಾಗೂ ಕ್ಯಾಂಟೀನ್‌ಗಳು: ಉಚಿತ ಅನ್ನಪ್ರಸಾದ ಕೇಂದ್ರಗಳು ಮತ್ತು ಇತರೆ ಆಹಾರ ಮಳಿಗೆಗಳು.
ಇತರ ಸೇವೆಗಳು: ಉಚಿತ ಲಗೇಜ್‌ ಕೌಂಟರ್‌ಗಳು, ಪಾದುಕಾ (ಚಪ್ಪಲಿ) ಡೆಪಾಸಿಟ್‌ ಕೇಂದ್ರಗಳು, ಕಲ್ಯಾಣಕಟ್ಟೆ (ಮುಡಿ ಕೊಡುವ ಸ್ಥಳ), ಕುಡಿಯುವ ನೀರಿನ ಘಟಕಗಳು ಮತ್ತು ಶೌಚಾಲಯಗಳು.
ತುರ್ತು ಸೇವೆಗಳು ಮತ್ತು ಸಾರಿಗೆ:
ಆಸ್ಪತ್ರೆಗಳು, ಪೊಲೀಸ್‌ ಠಾಣೆಗಳು, ಪಾರ್ಕಿಂಗ್‌ ಸ್ಥಳಗಳು, ಉಚಿತ ಬಸ್‌ ಮಾರ್ಗಗಳು ಹಾಗೂ ಬಸ್‌ ವೇಳಾಪಟ್ಟಿಗಳು.ತುರ್ತು ಸಹಾಯವಾಣಿ ಮತ್ತು ಡೌನ್‌ಲೋಡ್‌ ಮಾಡುವ ವಿಧಾನ:ಯಾವುದೇ ತುರ್ತು ಸಂದರ್ಭಗಳಲ್ಲಿ ತಕ್ಷಣವೇ ಸಂಪರ್ಕಿಸಲು ಅನುಕೂಲವಾಗುವಂತೆ ಆ್ಯಪ್‌ನಲ್ಲಿ ಒನ್‌-ಟಚ್‌ ಮೂಲಕ ಟಿಟಿಡಿ ಹೆಲ್ಪ್ ಲೈನ್‌, ಪೊಲೀಸ್‌ ಸಹಾಯವಾಣಿ ಮತ್ತು ತುರ್ತು ಸಂಪರ್ಕ ಸಂಖ್ಯೆಗಳನ್ನು ನೀಡಲಾಗಿದೆ. ಆಸಕ್ತ ಭಕ್ತರು ಗೂಗಲ್‌ ಪ್ಲೇ ಸ್ಟೋರ್‌ ಅಥವಾ ಆಪಲ್‌ ಆ್ಯಪ್‌ ಸ್ಟೋರ್‌ ಮೂಲಕ ಈ ವೆಂಕಟಾದ್ರಿ ಆ್ಯಪ್‌ ಅನ್ನು ಉಚಿತವಾಗಿ ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ.
