ಕರ್ನಾಟಕ ಬಿಜೆಪಿ : ಮನೆಯೊಂದು-ನಾಲ್ಕೈದು ಬಾಗಿಲು

ಬೆಂಗಳೂರು,ಜು.3- ರಾಜ್ಯ ರಾಜಕೀಯದಲ್ಲಿ ಅಧಿಕೃತ ವಿರೋಧ ಪಕ್ಷ ಬಿಜೆಪಿಯ ವರ್ತಮಾನದ ಸ್ಥಿತಿಗತಿಯನ್ನು ವಿಶ್ಲೇಷಿಸಿದರೆ, ಮನೆಯೊಂದು ಮೂರಲ್ಲ, ನಾಲ್ಕೈದು ಬಾಗಿಲು ಎಂಬ ಮಾತು ಅಕ್ಷರಶಃ ಸತ್ಯವಾಗುತ್ತಿದೆ.

ವಿರೋಧ ಪಕ್ಷದ ಸ್ಥಾನದಲ್ಲಿ ಬಲವಾಗಿ ನಿಲ್ಲಬೇಕಿದ್ದ ಕಮಲ ಪಡೆ, ಇಂದು ಆಂತರಿಕ ಭಿನ್ನಮತ, ನಾಯಕತ್ವದ ಗೊಂದಲ ಮತ್ತು ಕಾರ್ಯಕರ್ತರಲ್ಲಿನ ನಿರುತ್ಸಾಹದ ಸುಳಿಗೆ ಸಿಲುಕಿ ಅಯೋಮಯ ಸ್ಥಿತಿಯಲ್ಲಿದೆ. ಬಿಜೆಪಿಯಲ್ಲಿನ ಪ್ರಸ್ತುತ ಬಿಕ್ಕಟ್ಟಿಗೆ ಪ್ರಮುಖ ಕಾರಣವೆಂದರೆ ಪಕ್ಷದೊಳಗೆ ಉದ್ಭವಿಸಿರುವ ಬಹುಮುಖಿ ಬಣಗಳು.

ಕಳೆದ ವಿಧಾನಸಭಾ ಚುನಾವಣೆಯ ಸೋಲಿನ ಬಳಿಕ ಪಕ್ಷದಲ್ಲಿ ಪರಿವರ್ತನೆಯ ಗಾಳಿ ಬೀಸಬೇಕು ಎಂಬ ಆಕಾಂಕ್ಷೆ ಇತ್ತಾದರೂ, ಅದು ಸಂಘಟನಾತಕವಾಗಿ ಒಗ್ಗಟ್ಟನ್ನು ತರುವ ಬದಲು, ಪ್ರಭಾವಿ ನಾಯಕರ ನಡುವಿನ ಶೀತಲ ಸಮರಕ್ಕೆ ವೇದಿಕೆಯಾಗಿದೆ. ಹಳೆಯ ಹುಲಿಗಳು ಮತ್ತು ಹೊಸ ಪೀಳಿಗೆಯ ನಾಯಕರ ನಡುವಿನ ಹೊಂದಾಣಿಕೆಯ ಕೊರತೆ, ಪ್ರತಿ ಹಂತದಲ್ಲೂ ಬಣ ರಾಜಕೀಯಕ್ಕೆ ಪುಷ್ಟಿ ನೀಡುತ್ತಿದೆ.

ರಾಜ್ಯ ಮಟ್ಟದಲ್ಲಿ ಪಕ್ಷವನ್ನು ಮುನ್ನಡೆಸುವ ವಿಷಯದಲ್ಲಿ ದೆಹಲಿ ವರಿಷ್ಠರು ಕೈಗೊಂಡಿರುವ ತಟಸ್ಥ ನಿಲುವು ಕಾರ್ಯಕರ್ತರಲ್ಲಿ ಗೊಂದಲ ಮೂಡಿಸಿದೆ. ರಾಜ್ಯದ ನಾಯಕತ್ವವನ್ನು ನಿರ್ಧರಿಸುವಲ್ಲಿ ಅಥವಾ ವಿವಾದಗಳನ್ನು ಶಮನಗೊಳಿಸುವಲ್ಲಿ ದೆಹಲಿ ನಾಯಕತ್ವ ಈವರೆಗೆ ತೋರುತ್ತಿರುವ ಕೈಕಟ್ಟಿ ಕುಳಿತ ಧೋರಣೆಯು, ಸ್ಥಳೀಯ ಮಟ್ಟದಲ್ಲಿ ನಾಯಕರು ತಮದೇ ಆದ ಸ್ವತಂತ್ರ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಪ್ರೇರೇಪಿಸುತ್ತಿದೆ.

ಇದು ಪಕ್ಷದ ಶಿಸ್ತಿಗೆ ಧಕ್ಕೆ ತರುತ್ತಿದ್ದು, ವರಿಷ್ಠರ ಹಸ್ತಕ್ಷೇಪದ ಅಗತ್ಯವನ್ನು ಸಾರ್ವಜನಿಕವಾಗಿ ಚರ್ಚಿಸಲಾಗುತ್ತಿದೆ.ಪಕ್ಷದ ತಳಮಟ್ಟದ ಕಾರ್ಯಕರ್ತರು ಇಂದು ಅತಂತ್ರ ಸ್ಥಿತಿಯಲ್ಲಿದ್ದಾರೆ. ಸಂಘಟನಾತಕ ಸಭೆಗಳು ಕೇವಲ ಸಾಂಕೇತಿಕವಾಗಿ ನಡೆಯುತ್ತಿವೆಯೇ ಹೊರತು, ಅದರಲ್ಲಿ ಸ್ಪಷ್ಟವಾದ ಕಾರ್ಯಸೂಚಿ ಇಲ್ಲದಂತಾಗಿದೆ.

ದೆಹಲಿ ಮತ್ತು ರಾಜ್ಯದ ನಡುವಿನ ಸಂಪರ್ಕ ಕೊಂಡಿ ದುರ್ಬಲವಾಗಿರುವುದು, ಆಡಳಿತ ಪಕ್ಷದ ಲೋಪಗಳ ವಿರುದ್ಧ ಹೋರಾಡುವಲ್ಲಿ ಬಿಜೆಪಿಯ ತೀಕ್ಷ್ಣತೆಯನ್ನು ತಗ್ಗಿಸಿದೆ. ಇದು ಮತದಾರರ ಮೇಲೆ ನೇರ ಪರಿಣಾಮ ಬೀರುತ್ತಿದೆ.ಮುಂದಿನ ದಿನಗಳಲ್ಲಿ ರಾಜ್ಯದಲ್ಲಿ ನಡೆಯಲಿರುವ ವಿವಿಧ ಹಂತದ ಚುನಾವಣೆಗಳನ್ನು ಎದುರಿಸಲು ಬಿಜೆಪಿಗೆ ಈಗಿರುವ ಅಯೋಮಯ ಸ್ಥಿತಿ ದೊಡ್ಡ ತಡೆಗೋಡೆಯಾಗಿದೆ.

ಪಕ್ಷದೊಳಗಿನ ಅಸಮಾಧಾನವನ್ನು ಶಮನಗೊಳಿಸದೇ ಮತ್ತು ನಾಯಕತ್ವಕ್ಕೆ ಸ್ಪಷ್ಟ ದಿಕ್ಕು ನೀಡದೇ ಮುಂದೆ ಸಾಗುವುದು ಕಷ್ಟಸಾಧ್ಯ. ಒಗ್ಗಟ್ಟೇ ಬಲ ಎಂಬ ಮಂತ್ರವನ್ನು ಮರೆತರೆ, ವಿರೋಧ ಪಕ್ಷದ ಸ್ಥಾನವನ್ನು ಉಳಿಸಿಕೊಳ್ಳುವುದೂ ಮುಂದಿನ ದಿನಗಳಲ್ಲಿ ಕಠಿಣ ಸವಾಲಾಗಬಹುದು.ಒಗ್ಗಟ್ಟಿನ ಕೊರತೆ ಮತ್ತು ಬಣ ರಾಜಕೀಯ ಪಕ್ಷದೊಳಗೆ ಹಿರಿಯ ನಾಯಕರು, ಯುವ ಪೀಳಿಗೆ ಮತ್ತು ವಲಸೆ ಬಂದ ನಾಯಕರ ನಡುವೆ ಒಂದು ರೀತಿಯ ಅಂತರ ಸೃಷ್ಟಿ ಮಾಡಿದೆ. ಪ್ರತಿಯೊಂದು ಗುಂಪು ತನ್ನದೇ ಆದ ಆದ್ಯತೆಗಳನ್ನು ಹೊಂದಿರುವಂತೆ ಕಾಣುತ್ತಿದ್ದು, ಇದರಿಂದಾಗಿ ಪಕ್ಷದ ಆಧಾರ ಸ್ತಂಭವೇ ಅಲುಗಾಡುತ್ತಿರುವಂತಿದೆ.

ಒಂದು ಸಾಮಾನ್ಯ ಕಾರ್ಯಸೂಚಿಯ ಮೇಲೆ ಎಲ್ಲರೂ ಒಗ್ಗೂಡಿ ಕೆಲಸ ಮಾಡುವ ವಾತಾವರಣ ಸದ್ಯಕ್ಕೆ ಕಾಣಿಸುತ್ತಿಲ್ಲ. ಹೈಕಮಾಂಡ್‌ (ದೆಹಲಿ ನಾಯಕರು) ಈ ವಿಷಯದಲ್ಲಿ ಬಹಳ ಎಚ್ಚರಿಕೆಯ ಹೆಜ್ಜೆಯನ್ನು ಇಡುತ್ತಿದೆ. ಸಾಮಾನ್ಯವಾಗಿ ಕಟ್ಟುನಿಟ್ಟಿನ ಶಿಸ್ತಿಗೆ ಹೆಸರಾದ ಬಿಜೆಪಿ ವರಿಷ್ಠರು, ಸದ್ಯದ ಪರಿಸ್ಥಿತಿಯಲ್ಲಿ ಯಾವುದೇ ಕಠಿಣ ಕ್ರಮ ಕೈಗೊಳ್ಳದೆ ಮೌನ ವಹಿಸಿರುವುದು ಕಾರ್ಯಕರ್ತರಲ್ಲಿ ಗೊಂದಲ ಮೂಡಿಸಿದೆ.

ಇದು ಪರಿಸ್ಥಿತಿ ಸುಧಾರಣೆಯಾಗುವವರೆಗೆ ಕಾಯೋಣ ಎಂಬ ತಂತ್ರವೋ ಅಥವಾ ನಿಯಂತ್ರಣ ಸಾಧಿಸಲು ವಿಫಲರಾದರೋ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ. ನಾಯಕರ ಈ ಆಂತರಿಕ ಕಚ್ಚಾಟದಿಂದಾಗಿ ತಳಮಟ್ಟದ ಕಾರ್ಯಕರ್ತರು ಅತಂತ್ರರಾಗಿದ್ದಾರೆ.

ರಾಜ್ಯದ ಪ್ರಮುಖ ವಿರೋಧ ಪಕ್ಷವಾಗಿ ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸಬೇಕಾದ ಬಿಜೆಪಿ, ತನ್ನದೇ ಆಂತರಿಕ ಸಮಸ್ಯೆಗಳ ಸುಳಿಯಲ್ಲಿ ಸಿಲುಕಿಕೊಂಡಿರುವುದು ಪಕ್ಷದ ಮತಬ್ಯಾಂಕ್‌ಗೆ ಹಾನಿ ಉಂಟುಮಾಡುವ ಸಾಧ್ಯತೆಯಿದೆ. ಮುಂದಿನ ಚುನಾವಣೆಯ ದೃಷ್ಟಿಯಿಂದ ಅಥವಾ ಸರ್ಕಾರದ ವೈಫಲ್ಯಗಳನ್ನು ಎತ್ತಿ ತೋರಿಸುವಲ್ಲಿ ವಿಪಕ್ಷವಾಗಿ ಬಿಜೆಪಿ ನಿಭಾಯಿಸಬೇಕಾದ ಪಾತ್ರಕ್ಕೆ ಈ ಗೊಂದಲಗಳು ದೊಡ್ಡ ಅಡ್ಡಿಯಾಗಿವೆ.

ಒಂದು ಪಕ್ಷವಾಗಿ ಬಿಜೆಪಿ ತನ್ನ ಅಸ್ತಿತ್ವವನ್ನು ಮರುಸ್ಥಾಪಿಸಿಕೊಳ್ಳಬೇಕೆಂದರೆ, ಭಿನ್ನಮತವನ್ನು ಶಮನಗೊಳಿಸಿ, ಹೊಸದೊಂದು ಕಾರ್ಯತಂತ್ರದೊಂದಿಗೆ ಮುನ್ನಡೆಯುವುದು ಅನಿವಾರ್ಯವಾಗಿದೆ. ಇಲ್ಲವಾದರೆ, ಬಾಗಿಲುಗಳ ಸಂಖ್ಯೆ ಹೆಚ್ಚಾದಷ್ಟೂ ಮನೆಯ ಅಡಿಪಾಯ ಶಿಥಿಲವಾಗುತ್ತಾ ಹೋಗುತ್ತದೆ ಎಂಬುದು ಕಾರ್ಯಕರ್ತರ ಅಳಲು.

ಒಂದೆಡೆ ಸೈದ್ಧಾಂತಿಕ ಬದ್ಧತೆ, ಇನ್ನೊಂದೆಡೆ ಪ್ರಾಯೋಗಿಕ ರಾಜಕಾರಣ ಈ ಎರಡರ ನಡುವೆ ಸಮತೋಲನ ಸಾಧಿಸಬೇಕಾದ ಅನಿವಾರ್ಯ ನಾಯಕರ ಮುಂದಿದೆ. ವರಿಷ್ಠರು ಮೌನ ಮುರಿದು, ಆಂತರಿಕ ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು, ಪಕ್ಷವನ್ನು ಮರುಸಂಘಟಿಸಿದರೆ ಮಾತ್ರ ಕಮಲ ಪಡೆ ತನ್ನ ಹಳೆಯ ವೈಭವವನ್ನು ಮರಳಿ ಗಳಿಸಲು ಸಾಧ್ಯ.

ಇಲ್ಲವಾದಲ್ಲಿ, ಬಾಗಿಲುಗಳ ಸಂಖ್ಯೆ ಹೆಚ್ಚಿದಷ್ಟೂ ಮನೆಯ ಅಡಿಪಾಯ ದುರ್ಬಲವಾಗುವ ಅಪಾಯವನ್ನು ತಳ್ಳಿಹಾಕುವಂತಿಲ್ಲ. ಬಿಜೆಪಿ ಕೇವಲ ವಿರೋಧ ಪಕ್ಷದ ಪಾತ್ರವನ್ನು ಮಾತ್ರವಲ್ಲದೆ, ತನ್ನ ಆಂತರಿಕ ಆರೋಗ್ಯವನ್ನೂ ಕಾಪಾಡಿಕೊಳ್ಳುವ ತುರ್ತು ಅಗತ್ಯವಿದೆ. ದೆಹಲಿ ನಾಯಕರ ವೇಟಿಂಗ್‌ ಅಂಡ್‌ ವಾಚ್‌ (ಕಾಯುವ ಮತ್ತು ನೋಡುವ) ತಂತ್ರವು, ರಾಜ್ಯದಲ್ಲಿ ಪಕ್ಷದ ನೆಲೆಯನ್ನು ಮತ್ತಷ್ಟು ಸಡಿಲಗೊಳಿಸುವ ಮುನ್ನವೇ ಸರಿಪಡಿಸುವ ಅವಶ್ಯಕತೆ ಇದೆ.