ವಾಷಿಂಗ್ಟನ್, ಏ.4- ಸುಮಾರು ಐದು ವಾರಗಳಿಂದ ನಡೆಯುತ್ತಿರುವ ಯುದ್ಧದ ಮಧ್ಯೆ ಉದ್ವಿಗ್ನತೆ ತೀವ್ರಗೊಂಡಿರುವ ಸಂದರ್ಭದಲ್ಲಿ, ಇರಾನ್ ಅಮೆರಿಕದ ಎರಡು ವಿಮಾನಗಳನ್ನು ಪ್ರತ್ಯೇಕ ದಾಳಿಗಳಲ್ಲಿ ಹೊಡೆದುರುಳಿಸಿದೆ. ಒಂದು ವಿಮಾನದ ಸಿಬ್ಬಂದಿಯನ್ನು ರಕ್ಷಿಸಲಾಗಿದ್ದು, ಮತ್ತೊಬ್ಬ ಸೈನಿಕನ ಸ್ಥಿತಿ ಇನ್ನೂ ತಿಳಿದುಬಂದಿಲ್ಲ.
ಈ ಸಂಘರ್ಷ ಆರಂಭವಾದ ನಂತರ ಅಮೆರಿಕದ ವಿಮಾನಗಳನ್ನು ಮೊದಲ ಬಾರಿಗೆ ಹೊಡೆದುರುಳಿಸಿರುವ ಘಟನೆ ಇದಾಗಿದೆ. ಇದಕ್ಕೂ ಎರಡು ದಿನಗಳ ಮುನ್ನ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರಾಷ್ಟ್ರನ್ನುದ್ದೇಶಿಸಿದ ಭಾಷಣದಲ್ಲಿ ಇರಾನ್ ಅನ್ನು ಸಂಪೂರ್ಣವಾಗಿ ದುರ್ಬಲಗೊಳಿಸಿದ್ದೇವೆ, ಯುದ್ಧವನ್ನು ಶೀಘ್ರವೇ ಮುಗಿಸುತ್ತೇವೆ ಎಂದು ಹೇಳಿದ್ದರು. ಅಧಿಕಾರಿಗಳ ಪ್ರಕಾರ, ಒಂದು ಫೈಟರ್ ಜೆಟ್ ಇರಾನ್ ಪ್ರದೇಶದಲ್ಲಿ ಹೊಡೆದುರುಳಿಸಲಾಯಿತು. ಅದರಲ್ಲಿದ್ದ ಒಬ್ಬ ಸಿಬ್ಬಂದಿಯನ್ನು ರಕ್ಷಿಸಲಾಯಿತಾದರೂ, ಇನ್ನೊಬ್ಬನಿಗಾಗಿ ಅಮೆರಿಕ ಸೇನೆ ಶೋಧ ಕಾರ್ಯಾಚರಣೆ ನಡೆಸುತ್ತಿದೆ.
ವೈಟ್ ಹೌಸ್ ಅಥವಾ ಪೆಂಟಗನ್ ಈ ಬಗ್ಗೆ ಅಧಿಕತ ಮಾಹಿತಿ ಬಿಡುಗಡೆ ಮಾಡಿಲ್ಲ. ಎನ್ಬಿಸಿ ನ್ಯೂಸ್ಗೆ ನೀಡಿದ ದೂರವಾಣಿ ಸಂದರ್ಶನದಲ್ಲಿ ಟ್ರಂಪ್, ಈ ಘಟನೆ ಇರಾನ್ ಜೊತೆ ನಡೆಯುತ್ತಿರುವ ಮಾತುಕತೆಗಳ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಹೇಳಿದರು.
ಇದು ಯುದ್ಧ, ಇಂತಹ ಘಟನೆಗಳು ನಡೆಯುತ್ತವೆ ಎಂದು ಅವರು ಪ್ರತಿಕ್ರಿಯಿಸಿದ್ದಾರೆ.
ಇನ್ನೊಂದೆಡೆ, ಇರಾನ್ ಸರ್ಕಾರಿ ಮಾಧ್ಯಮಗಳು ಪರ್ಷಿಯನ್ ಕೊಲ್ಲಿಯಲ್ಲಿ ಇರಾನ್ ರಕ್ಷಣಾ ಪಡೆಗಳ ದಾಳಿಗೆ ಒಳಗಾಗಿ ಅಮೆರಿಕದ ಎ-10 ದಾಳಿ ವಿಮಾನ ಪತನಗೊಂಡಿದೆ ಎಂದು ತಿಳಿಸಿವೆ. ಆದರೆ ವಿಮಾನ ಪತನಕ್ಕೆ ನಿಖರ ಕಾರಣ ಏನು ಎಂಬುದು ಸ್ಪಷ್ಟವಾಗಿಲ್ಲ ಎಂದು ಅಮೆರಿಕದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಎರಡನೇ ಸೈನಿಕನ ಸ್ಥಿತಿ ಅಸ್ಪಷ್ಟ:
ಇರಾನ್ ಗಲ್ಫ್ ಪ್ರದೇಶದ ಇಂಧನ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆಸಿ, ವಿಶ್ವದ ಐದನೇ ಭಾಗದ ತೈಲ ಮತ್ತು ಅನಿಲ ಸಾಗಣೆ ನಡೆಯುವ ಹಾರ್ಮುಜ್ ಕಣಿವೆಯ ಮೇಲಿನ ನಿಯಂತ್ರಣವನ್ನು ಬಿಗಿಗೊಳಿಸಿರುವುದರಿಂದ ಜಾಗತಿಕ ಷೇರು ಮಾರುಕಟ್ಟೆಗಳಲ್ಲಿ ಅಸ್ಥಿರತೆ ಉಂಟಾಗಿದೆ. ತೈಲದ ಬೆಲೆ ಏರಿಕೆಯಿಂದ ಆಹಾರ ಸೇರಿದಂತೆ ಅನೇಕ ಅಗತ್ಯ ವಸ್ತುಗಳ ಬೆಲೆ ಹೆಚ್ಚುವ ಭೀತಿ ಎದುರಾಗಿದೆ.
ಅಮೆರಿಕದ ಮೇಲೆ ಹೊಸ ಒತ್ತಡದ ಸೂಚನೆ:
ರಕ್ಷಣಾ ಕಾರ್ಯಾಚರಣೆಗೆ ಮುನ್ನ ಸಾಮಾಜಿಕ ಜಾಲತಾಣಗಳಲ್ಲಿ ಪರ್ವತ ಪ್ರದೇಶಗಳ ಮೇಲೆ ಅಮೆರಿಕದ ಡ್ರೋನ್ ಹಾಗೂ ಹೆಲಿಕಾಪ್ಟರ್ಗಳು ಸಂಚರಿಸುತ್ತಿರುವ ದೃಶ್ಯಗಳು ವೈರಲ್ ಆಗಿದ್ದವು. ಇರಾನ್ ಸರ್ಕಾರಿ ಟಿವಿಗೆ ಸಂಬಂಧಿಸಿದ ವಾಹಿನಿಯೊಂದು ಪೈಲಟ್ ಪ್ಯಾರಶೂಟ್ ಮೂಲಕ ಹೊರಬಿದ್ದಿದ್ದಾನೆ ಎಂದು ಹೇಳಿದೆ.
ನೀರು ಶುದ್ಧೀಕರಣ ಘಟಕಗಳ ಮೇಲೆ ದಾಳಿ:
ವಿಮಾನ ಘಟನೆಗಳ ನಡುವೆ, ಇರಾನ್ ಕುವೈತ್ನಮಿನಾ ಅಲ್-ಅಹದಿ ತೈಲ ಶುದ್ಧೀಕರಣ ಘಟಕದ ಮೇಲೆ ದಾಳಿ ನಡೆಸಿತು. ಅಗ್ನಿಶಾಮಕ ದಳ ಬೆಂಕಿ ನಿಯಂತ್ರಣಕ್ಕೆ ಪ್ರಯತ್ನಿಸುತ್ತಿದೆ ಎಂದು ಕುವೈತ್ ಪೆಟ್ರೋಲಿಯಂ ಕಾರ್ಪೊರೇಷನ್ ತಿಳಿಸಿದೆ.
ಇರಾನ್ ದಾಳಿಯಿಂದ ಉಪ್ಪುನೀರು ಶುದ್ಧೀಕರಣ ಘಟಕಕ್ಕೂ ಹಾನಿಯಾಗಿದೆ. ಗಲ್ಫ್ ರಾಷ್ಟ್ರಗಳ ಕುಡಿಯುವ ನೀರಿನ ಮುಖ್ಯ ಮೂಲಗಳಾದ ಇವುಗಳು ಯುದ್ಧದ ಪ್ರಮುಖ ಗುರಿಗಳಾಗಿವೆ.ಬಹ್ರೇನ್ನಲ್ಲಿ ಸೈರನ್ಗಳು ಮೊಳಗಿದ್ದು, ಸೌದಿ ಅರೇಬಿಯಾ ಹಲವು ಇರಾನ್ ಡ್ರೋನ್ಗಳನ್ನು ಹೊಡೆದುರುಳಿಸಿದೆ ಎಂದು ತಿಳಿಸಿದೆ. ಇಸ್ರೇಲ್ ಕಡೆಗೆ ಕ್ಷಿಪಣಿಗಳು ಬರುತ್ತಿರುವುದಾಗಿ ವರದಿಯಾಗಿದೆ. ಯುಎಇನಲ್ಲಿ ಕ್ಷಿಪಣಿ ಅವಶೇಷಗಳಿಂದ ಅನಿಲ ಕ್ಷೇತ್ರದಲ್ಲಿ ಬೆಂಕಿ ಕಾಣಿಸಿಕೊಂಡ ಕಾರಣ ಕಾರ್ಯಾಚರಣೆ ಸ್ಥಗಿತಗೊಳಿಸಲಾಗಿದೆ. ಲೆಬನಾನ್ನಲ್ಲಿ ಇಸ್ರೇಲ್ ಡ್ರೋನ್ ದಾಳಿಯಲ್ಲಿ ಶುಕ್ರವಾರ ಪ್ರಾರ್ಥನೆ ಮುಗಿಸಿ ಹೊರಬರುತ್ತಿದ್ದ ಇಬ್ಬರು ಸಾವನ್ನಪ್ಪಿದ್ದಾರೆ ಎಂದು ವರದಿ.
ಯುದ್ಧದಲ್ಲಿ ಸಾವಿರಾರು ಸಾವು:
ಫೆಬ್ರವರಿ 28ರಿಂದ ಆರಂಭವಾದ ಯುದ್ಧದಲ್ಲಿ ಇರಾನ್ನಲ್ಲಿ 1,900ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ. ಗಲ್ಫ್ ರಾಷ್ಟ್ರಗಳು ಮತ್ತು ವೆಸ್ಟ್ ಬ್ಯಾಂಕ್ನಲ್ಲಿ ಎರಡು ಡಜನ್ಗಿಂತ ಹೆಚ್ಚು ಮಂದಿ ಮತಪಟ್ಟಿದ್ದು, ಇಸ್ರೇಲ್ನಲ್ಲಿ 19 ಮತ್ತು ಅಮೆರಿಕದ 13 ಸೈನಿಕರು ಸಾವನ್ನಪ್ಪಿದ್ದಾರೆ.
ಲೆಬನಾನ್ನಲ್ಲಿ 1,300ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಒಂದು ಮಿಲಿಯನಿಗಿಂತ ಹೆಚ್ಚು ಜನರು ಸ್ಥಳಾಂತರಗೊಂಡಿದ್ದಾರೆ. ಅಲ್ಲಿಯೂ 10 ಇಸ್ರೇಲಿ ಸೈನಿಕರು ಮತಪಟ್ಟಿದ್ದಾರೆ.
ಸಡಿಲಗೊಳ್ಳದ ಹಾರ್ಮುಜ್ ಕಣಿವೆಯ ಮೇಲಿನ ಹಿಡಿತ:
ಜಾಗತಿಕ ಆರ್ಥಿಕತೆಗೆ ಮಹತ್ವದ ಹಾರ್ಮುಜ್ ಕಣಿವೆಯ ಮೇಲಿನ ಇರಾನ್ ನಿಯಂತ್ರಣ ಅಂತ್ಯಗೊಳಿಸಲು ವಿಶ್ವ ನಾಯಕರು ಪ್ರಯತ್ನಿಸುತ್ತಿದ್ದಾರೆ. ಈ ವಿಚಾರವನ್ನು ಯುಎನ್ ಭದ್ರತಾ ಮಂಡಳಿ ಶನಿವಾರ ಚರ್ಚಿಸುವ ನಿರೀಕ್ಷೆಯಿದೆ.
ಟ್ರಂಪ್ ಸಾಮಾಜಿಕ ಜಾಲತಾಣದಲ್ಲಿ ಸ್ವಲ್ಪ ಸಮಯ ಕೊಟ್ಟರೆ ಹಾರ್ಮುಜ್ ಕಣಿವೆಯನ್ನು ತೆರೆಯಬಹುದು, ತೈಲ ಪಡೆದು ದೊಡ್ಡ ಲಾಭ ಮಾಡಬಹುದು ಎಂದು ಬರೆದಿದ್ದಾರೆ. ಯುದ್ಧ ಆರಂಭವಾದ ನಂತರ ಬ್ರೆಂಟ್ ಕ್ರೂಡ್ ತೈಲದ ಸ್ಪಾಟ್ ಬೆಲೆ 50 ಶೇಕಡಾಕ್ಕೂ ಹೆಚ್ಚು ಏರಿಕೆಯಾಗಿ ಬ್ಯಾರೆಲ್ಗೆ ಸುಮಾರು 109 ಡಾಲರ್ಗೆ ತಲುಪಿದೆ.