Homeಅಂತಾರಾಷ್ಟ್ರೀಯಟರ್ಕಿ ವಿರುದ್ಧ ಹರಿಹಾಯ್ದ ಭಾರತ, ವಿಶ್ವಸಂಸ್ಥೆ ನಿರ್ಣಯದ ವಿರುದ್ಧ ಮತ

ಟರ್ಕಿ ವಿರುದ್ಧ ಹರಿಹಾಯ್ದ ಭಾರತ, ವಿಶ್ವಸಂಸ್ಥೆ ನಿರ್ಣಯದ ವಿರುದ್ಧ ಮತ

ವಿಶ್ವಸಂಸ್ಥೆ, ನ.17 (ಪಿಟಿಐ)- ವಿಶ್ವಸಂಸ್ಥೆ ಮತ್ತು ಇಸ್ಲಾಮಿಕ್‌ ಸಹಕಾರ ಸಂಘಟನೆಯ ನಡುವಿನ ಸಹಕಾರಕ್ಕೆ ಸಂಬಂಧಿಸಿದ ನಿರ್ಣಯವೊಂದರ ಕುರಿತಾದ ಸಮಾಲೋಚನೆಗಳಿಂದ ಭಾರತ ಮತ್ತು ಇತರ ಸದಸ್ಯ ರಾಷ್ಟ್ರಗಳನ್ನು ಹೊರಗಿಡಲು ಟರ್ಕಿ ತೆಗೆದುಕೊಂಡ ಸ್ಪಷ್ಟ ಮತ್ತು ಉದ್ದೇಶಪೂರ್ವಕ ನಿರ್ಧಾರದ ವಿರುದ್ಧ ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.

ಅಲ್ಲದೆ, ಸಾಮಾನ್ಯ ಸಭೆಯಲ್ಲಿ ಮಂಡಿಸಲಾದ ಈ ಕರಡು ನಿರ್ಣಯದ ವಿರುದ್ಧ ಭಾರತ ಮತ ಚಲಾಯಿಸಿದೆ. ಇರಾಕ್‌ ಮಂಡಿಸಿದ ‘ವಿಶ್ವಸಂಸ್ಥೆ ಮತ್ತು ಇಸ್ಲಾಮಿಕ್‌ ಸಹಕಾರ ಸಂಘಟನೆಯ ನಡುವಿನ ಸಹಕಾರ’ ಎಂಬ ಕರಡು ನಿರ್ಣಯವನ್ನು ಮತದಾನದ ಮೂಲಕ ಅಂಗೀಕರಿಸಲಾಯಿತು.

ಇದರಲ್ಲಿ 112 ರಾಷ್ಟ್ರಗಳು ಪರವಾಗಿ, ಆರು ರಾಷ್ಟ್ರಗಳು ವಿರುದ್ಧವಾಗಿ ಮತ ಚಲಾಯಿಸಿದರೆ, 39 ರಾಷ್ಟ್ರಗಳು ಮತದಾನದಿಂದ ದೂರ ಉಳಿದವು. ಅರ್ಮೇನಿಯಾ, ಸೈಪ್ರಸ್‌, ಗ್ರೀಸ್‌, ಇಸ್ರೇಲ್‌ ಮತ್ತು ಅಮೆರಿಕದೊಂದಿಗೆ ಭಾರತವೂ ಈ ನಿರ್ಣಯದ ವಿರುದ್ಧ ಮತ ಚಲಾಯಿಸಿತು.

ಈ ನಿರ್ಣಯದ ಪ್ರಕ್ರಿಯೆಯನ್ನು ಸುಗಮಗೊಳಿಸುವ ಜವಾಬ್ದಾರಿಯನ್ನು ಟರ್ಕಿ ವಹಿಸಿಕೊಂಡಿತ್ತು. ಭಾರತದ ಜೊತೆಗೆ ಸೈಪ್ರಸ್‌ ಮತ್ತು ಗ್ರೀಸ್‌ ಸೇರಿದಂತೆ ಇತರ ದೇಶಗಳು ಕೂಡ ಈ ಕರಡು ನಿರ್ಣಯದ ಕುರಿತಾದ ಮಾತುಕತೆಗಳ ಪ್ರಕ್ರಿಯೆಯಲ್ಲಿ ಅಂಕಾರಾ (ಟರ್ಕಿ) ಅನುಸರಿಸಿದ ಪಾರದರ್ಶಕತೆ ಮತ್ತು ಎಲ್ಲರನ್ನೂ ಒಳಗೊಳ್ಳುವಿಕೆಯ ಕೊರತೆಯನ್ನು ಟೀಕಿಸಿದವು.

ವಿಶ್ವಸಂಸ್ಥೆಯಲ್ಲಿ ಭಾರತದ ಉಪ ಶಾಶ್ವತ ಪ್ರತಿನಿಧಿ ರಾಯಭಾರಿ ಯೋಜನಾ ಪಟೇಲ್‌ ಮಾತನಾಡಿ, ಈ ನಿರ್ಣಯದ ಕರಡು ಪ್ರತಿಗಳನ್ನು ಹಂಚಿಕೆ ಮಾಡುವಾಗ, ವಿಶ್ವಸಂಸ್ಥೆಯ ಶಾಶ್ವತ ವೀಕ್ಷಕ ನಿಯೋಗವು ಭಾರತೀಯ ನಿಯೋಗವನ್ನೂ ಮತ್ತು ಇತರ ಹಲವು ದೇಶಗಳನ್ನೂ ಉದ್ದೇಶಪೂರ್ವಕವಾಗಿಯೇ ಹೊರಗಿಟ್ಟಿದೆ ಎಂದು ಹೇಳಿದರು.

ಮತದಾನದ ನಂತರ ತಮ್ಮ ನಿಲುವನ್ನು ವಿವರಿಸಿದ ಪಟೇಲ್‌, ಈ ನಿರ್ಣಯದ ಪ್ರಕ್ರಿಯೆಯನ್ನು ಸುಗಮಗೊಳಿಸಿದವರು ಅನುಸರಿಸಿದ ಕಾರ್ಯವಿಧಾನಗಳನ್ನು ತೀವ್ರವಾಗಿ ಟೀಕಿಸಿದರು. ಇದನ್ನು ಕಳವಳಕಾರಿ ವಿಷಯ ಎಂದು ಬಣ್ಣಿಸಿದ ಅವರು, ಈ ಸಂಪೂರ್ಣ ಪ್ರಕ್ರಿಯೆಯ ಬಗ್ಗೆ ತನಿಖೆ ನಡೆಸಬೇಕೆಂದು ಆಗ್ರಹಿಸಿದರು.

“ನನ್ನ ನಿಯೋಗವು ಈ ನಿರ್ಣಯದ ವಿರುದ್ಧ ಮತ ಚಲಾಯಿಸಿದೆ. ಇದಕ್ಕೆ ಕೇವಲ ನಿರ್ಣಯದ ವಿಷಯವಸ್ತು ಮಾತ್ರವಲ್ಲದೆ, ಮಾತುಕತೆಗಳನ್ನು ಆಯೋಜಿಸಿದವರು ಅನುಸರಿಸಿದ ಕಾರ್ಯವಿಧಾನಗಳಿಗೆ ಸಂಬಂಧಿಸಿದ ಇನ್ನಷ್ಟು ಗಂಭೀರವಾದ ಮತ್ತು ಕಳವಳಕಾರಿ ವಿಷಯವೂ ಕಾರಣವಾಗಿದೆ” ಎಂದು ಪಟೇಲ್‌ ಹೇಳಿದರು.

RELATED ARTICLES

Latest News