ಮುಂಬೈ, ಅ.15- ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ಕೈಗೊಂಡಿರುವ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿನ ಮಧ್ಯಪ್ರವೇಶ ಹಾಗೂ ನಿಯಂತ್ರಣ ಕ್ರಮಗಳ ಪರಿಣಾಮವಾಗಿ ಇಂದು ಆರಂಭಿಕ ವಹಿವಾಟಿನಲ್ಲಿ ಅಮೆರಿಕದ ಡಾಲರ್‌ ಎದುರು ರೂಪಾಯಿ ಮೌಲ್ಯ 31 ಪೈಸೆ ಏರಿಕೆಯಾಗಿ 94.86ಕ್ಕೆ ತಲುಪಿದೆ.
ಕೇಂದ್ರ ಬ್ಯಾಂಕ್‌ನ ಮಧ್ಯಪ್ರವೇಶ ಮತ್ತು ಡಾಲರ್‌ ಖರೀದಿಗೆ ಸಂಬಂಧಿಸಿದ ದೀರ್ಘಾವಧಿಯ ವಹಿವಾಟುಗಳನ್ನು ಹಿಂಪಡೆಯುತ್ತಿರುವುದು ರೂಪಾಯಿ ಮೌಲ್ಯ ಏರಿಕೆಗೆ ಕಾರಣವಾಗಿದೆ ಎಂದು ಮಾರುಕಟ್ಟೆ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಆದರೆ, ಜಾಗತಿಕ ಆರ್ಥಿಕ ಪರಿಸ್ಥಿತಿಯಲ್ಲಿನ ಸವಾಲುಗಳು ರೂಪಾಯಿ ಮತ್ತಷ್ಟು ಏರಿಕೆ ಕಾಣುವುದಕ್ಕೆ ಅಡ್ಡಿಯಾಗಬಹುದು ಎಂದು ಅವರು ಹೇಳಿದ್ದಾರೆ.
ಅಂತರಬ್ಯಾಂಕ್‌ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ರೂಪಾಯಿ 94.95ರಲ್ಲಿ ವಹಿವಾಟು ಆರಂಭಿಸಿತು. ಬಳಿಕ ಚೇತರಿಕೆ ಕಂಡು 94.86ಕ್ಕೆ ತಲುಪಿತು. ಇದು ಹಿಂದಿನ ದಿನದ ಮುಕ್ತಾಯದ ಮಟ್ಟಕ್ಕೆ ಹೋಲಿಸಿದರೆ 31 ಪೈಸೆಯ ಏರಿಕೆಯಾಗಿದೆ. ಬುಧವಾರ ಡಾಲರ್‌ ಎದುರು ರೂಪಾಯಿ 19 ಪೈಸೆ ಏರಿಕೆಯಾಗಿ 95.17ರಲ್ಲಿ ವಹಿವಾಟು ಮುಕ್ತಾಯಗೊಳಿಸಿತ್ತು.
ರೂಪಾಯಿ ಈಗ ಪ್ರಮುಖ ಮಟ್ಟವಾಗಿ 94.80ಕ್ಕೆ ಬಂದಿರುವುದು ಗಮನ ಸೆಳೆಯುತ್ತಿದೆ ಎಂದು ಸಿಆರ್‌ ಫಾರೆಕ್ಸ್‌ ಅಡ್ವೈಸರ್ಸ್‌ನ ವ್ಯವಸ್ಥಾಪಕ ನಿರ್ದೇಶಕ ಅಮಿತ್‌ ಪಬಾರಿ ತಿಳಿಸಿದ್ದಾರೆ.ಭಾರತದ ಸಗಟು ಬೆಲೆ ಸೂಚ್ಯಂಕ (ಡಬ್ಲ್ಯುಪಿಐ) ಆಧಾರಿತ ಹಣದುಬ್ಬರವು ಶೇ. 9.92ರಿಂದ ಶೇ. 11.39ಕ್ಕೆ ಏರಿಕೆಯಾಗಿದೆ. ಆಹಾರ ಹಣದುಬ್ಬರ ಶೇ. 8.66ಕ್ಕೆ ತಲುಪಿದೆ. ಇದರೊಂದಿಗೆ ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಆಧಾರಿತ ಹಣದುಬ್ಬರ ಶೇ. 5.54ರಷ್ಟಿರುವುದು ಹಣದುಬ್ಬರದ ಒತ್ತಡವನ್ನು ಹೆಚ್ಚಿಸಿದೆ.
ಈ ಎರಡು ಸೂಚ್ಯಂಕಗಳಲ್ಲಿನ ಏರಿಕೆಯ ಹಿನ್ನೆಲೆಯಲ್ಲಿ ಆರ್‌ಬಿಐ ಬಡ್ಡಿದರ ಕಡಿತದ ಪರವಾದ ನಿಲುವು ತಳೆಯುವುದು ಕಷ್ಟವಾಗಬಹುದು ಎಂದು ಪಬಾರಿ ಅಭಿಪ್ರಾಯಪಟ್ಟಿದ್ದಾರೆ.ಮುಂದಿನ 12 ತಿಂಗಳಲ್ಲಿ ಬಡ್ಡಿದರ ಏರಿಕೆಯಾಗಬಹುದು ಎಂಬ ಮಾರುಕಟ್ಟೆಯ ನಿರೀಕ್ಷೆಯೂ ಹೆಚ್ಚಾಗಿದೆ. ಕಠಿಣ ಹಣಕಾಸು ನೀತಿ ಜಾರಿಗೆ ಬಂದರೆ, ಅನುಕೂಲಕರ ಬಡ್ಡಿದರ ವ್ಯತ್ಯಾಸ ಮತ್ತು ಬಡ್ಡಿ ಲಾಭ ಪಡೆಯುವ ಉದ್ದೇಶದ ಬಂಡವಾಳ ಹರಿವಿನ ಮೂಲಕ ರೂಪಾಯಿಗೆ ಬೆಂಬಲ ದೊರೆಯಬಹುದು ಎಂದು ಅವರು ಹೇಳಿದ್ದಾರೆ.
ಡಾಲರ್‌ ಸೂಚ್ಯಂಕ ಮತ್ತು ಕಚ್ಚಾ ತೈಲ ಬೆಲೆ ಇಳಿಕೆ:
ಆರು ಪ್ರಮುಖ ಕರೆನ್ಸಿಗಳ ಎದುರು ಅಮೆರಿಕದ ಡಾಲರ್‌ನ ಬಲವನ್ನು ಅಳೆಯುವ ಡಾಲರ್‌ ಸೂಚ್ಯಂಕವು ಶೇ. 0.54ರಷ್ಟು ಇಳಿಕೆಯಾಗಿ 101.99ಕ್ಕೆ ತಲುಪಿತ್ತು.ಜಾಗತಿಕ ಕಚ್ಚಾ ತೈಲದ ಮಾನದಂಡವಾಗಿರುವ ಬ್ರೆಂಟ್‌ ಕಚ್ಚಾ ತೈಲದ ಭವಿಷ್ಯದ ವಹಿವಾಟಿನ ಬೆಲೆ ಶೇ. 1.66ರಷ್ಟು ಇಳಿಕೆಯಾಗಿ ಪ್ರತಿ ಬ್ಯಾರೆಲ್‌ಗೆ 104.30 ಡಾಲರ್‌ಗೆ ತಲುಪಿತ್ತು.
ಷೇರುಪೇಟೆಯಲ್ಲೂ ಏರಿಕೆ:
ದೇಶೀಯ ಷೇರುಪೇಟೆಯಲ್ಲಿ ಗುರುವಾರ ಆರಂಭಿಕ ವಹಿವಾಟಿನ ವೇಳೆ ಏರಿಕೆ ಕಂಡುಬಂದಿತು. ಬಿಎಸ್‌ಇ ಸೆನ್ಸೆಕ್ಸ್‌ 354 ಅಂಕಗಳಷ್ಟು ಏರಿಕೆಯಾಗಿ 73,157.43ಕ್ಕೆ ತಲುಪಿತು. ಎನ್‌ಎಸ್‌ಇ ನಿಫ್ಟಿ 96.15 ಅಂಕಗಳ ಏರಿಕೆಯೊಂದಿಗೆ 22,726.05ರಲ್ಲಿ ವಹಿವಾಟು ನಡೆಸಿತು.
