ಬೆಂಗಳೂರು, ಜೂ.4- ಕರ್ನಾಟಕ ಸರ್ಕಾರಕ್ಕೆ ಅತಿ ಹೆಚ್ಚು ಆದಾಯ ತಂದುಕೊಡುವ ಅಬಕಾರಿ ಇಲಾಖೆಗೆ ದೊಡ್ಡ ಆಘಾತ ಎದುರಾಗಿದೆ. ಕಳೆದ ಏಪ್ರಿಲ್ ತಿಂಗಳಿಗೆ ಹೋಲಿಸಿದರೆ ಮೇ ತಿಂಗಳಲ್ಲಿ ರಾಜ್ಯದಲ್ಲಿ ಮದ್ಯ ಮತ್ತು ಬಿಯರ್ ಮಾರಾಟದಲ್ಲಿ ಭಾರಿ ಇಳಿಕೆ ಕಂಡುಬಂದಿದೆ. ಇದರಿಂದಾಗಿ ಕೇವಲ ಒಂದು ತಿಂಗಳಲ್ಲಿ ಸರ್ಕಾರದ ಆದಾಯಕ್ಕೆ ಬರೋಬ್ಬರಿ 455 ಕೋಟಿ ರೂಪಾಯಿ ನಷ್ಟವಾಗಿದೆ.
ಅಬಕಾರಿ ಇಲಾಖೆಯ ಅಂಕಿ-ಅಂಶಗಳ ಪ್ರಕಾರ, ಏಪ್ರಿಲ್ನಲ್ಲಿ 3,687 ಕೋಟಿ ರೂಪಾಯಿ ಆದಾಯವಿದ್ದರೆ, ಮೇ ತಿಂಗಳಲ್ಲಿ ಅದು 3,232 ಕೋಟಿ ರೂಪಾಯಿಗೆ ಕುಸಿದಿದೆ. ಭಾರತೀಯ ತಯಾರಿಕೆಯ ವಿದೇಶಿ ಮದ್ಯ ಮಾರಾಟವು ಏಪ್ರಿಲ್ನ 68.17 ಲಕ್ಷ ಬಾಕ್ಸ್ ಗಳಿಂದ ಮೇನಲ್ಲಿ 51.17 ಲಕ್ಷ ಬಾಕ್್ಸಗಳಿಗೆ ಇಳಿದಿದೆ. ಅಂದರೆ ಸುಮಾರು 17 ಲಕ್ಷ ಬಾಕ್ಸ್ ಗಳಷ್ಟು ಭಾರಿ ಕುಸಿತ ದಾಖಲಾಗಿದೆ. ಬಿಯರ್ ಮಾರಾಟವೂ 50.39 ಲಕ್ಷ ಬಾಕ್ಸ್ ಗಳಿಂದ 48.97 ಲಕ್ಷ ಬಾಕ್್ಸಗಳಿಗೆ ಇಳಿಕೆಯಾಗಿದೆ.
ಬೇಸಿಗೆಯ ಬಿಸಿಲು ಹೆಚ್ಚಾಗುವ ಸಮಯದಲ್ಲಿ ಮದ್ಯ ಮಾರಾಟ ಸಾಮಾನ್ಯವಾಗಿ ಹೆಚ್ಚಾಗುತ್ತದೆ. ಆದರೆ ಈ ಬಾರಿ ಅನಿರೀಕ್ಷಿತವಾಗಿ ಬೇಡಿಕೆ ಕುಸಿದಿರುವುದು ಸರ್ಕಾರಕ್ಕೆ ಆತಂಕ ತಂದಿದೆ. ಅಬಕಾರಿ ಇಲಾಖೆಯು ಈ ಇಳಿಕೆಗೆ ನಿಖರ ಕಾರಣಗಳನ್ನು ಪತ್ತೆಹಚ್ಚಲು ಪರಿಶೀಲನೆ ಆರಂಭಿಸಿದೆ. ಬೆಲೆ ಏರಿಕೆ, ಜನರ ಖರ್ಚು ಕಡಿತ ಅಥವಾ ಬೇರೆ ಯಾವುದೇ ಕಾರಣಗಳಿರಬಹುದು ಎಂಬುದನ್ನು ತನಿಖೆ ಮಾಡಲಾಗುತ್ತಿದೆ.
ಈ ಕುಸಿತವು ಸರ್ಕಾರದ ಬೊಕ್ಕಸಕ್ಕೆ ದೊಡ್ಡ ಹೊಡೆತವಾಗಿದೆ. ಅಬಕಾರಿ ಆದಾಯವು ರಾಜ್ಯದ ಒಟ್ಟು ಆದಾಯದಲ್ಲಿ ಮುಖ್ಯ ಪಾಲು ಹೊಂದಿದೆ. ಈ ನಷ್ಟವು ರಾಜ್ಯದ ಆರ್ಥಿಕ ಯೋಜನೆಗಳ ಮೇಲೆ ಪರಿಣಾಮ ಬೀರಬಹುದು ಎಂದು ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ.
ಸರ್ಕಾರವು ಮದ್ಯ ಮಾರಾಟ ಹೆಚ್ಚಿಸಲು ಹೊಸ ತಂತ್ರಗಳನ್ನು ರೂಪಿಸುತ್ತಿದೆಯಾ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ ಈ ಇಳಿಕೆಯು ಮದ್ಯಪಾನದ ವಿರುದ್ಧದ ಜಾಗೃತಿ ಅಭಿಯಾನಗಳು ಅಥವಾ ಆರ್ಥಿಕ ಕಾರಣಗಳಿಂದಾಗಿರಬಹುದು ಎಂಬ ಚರ್ಚೆಗಳು ಆರಂಭವಾಗಿವೆ. ಈ ಬೆಳವಣಿಗೆಯು ರಾಜ್ಯದ ಆರ್ಥಿಕತೆಗೆ ಸವಾಲು ಒಡ್ಡುವಂತಿದೆ. ಅಬಕಾರಿ ಇಲಾಖೆಯು ಮುಂದಿನ ತಿಂಗಳುಗಳಲ್ಲಿ ಮಾರಾಟ ಹೆಚ್ಚಿಸುವ ನಿರೀಕ್ಷೆಯಲ್ಲಿದೆ.
