ಬೆಂಗಳೂರು,ಅ.8- ಕೆಪಿಎಸ್‌‍ಸಿ ಪಶುವೈದ್ಯಾಧಿಕಾರಿಗಳ ನೇಮಕಾತಿ ಪರೀಕ್ಷೆಯಲ್ಲಿನ ಅಕ್ರಮಕ್ಕೆ ಸಂಬಂಧಿಸಿದಂತೆ ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್‌ ಮತ್ತು ಸದಸ್ಯೆ ಬಿ.ವಿ.ಗೀತಾ ಅವರ ವಿರುದ್ಧ ಗಂಭೀರ ಆರೋಪಗಳು ಕೇಳಿಬಂದಿವೆ. ಪರೀಕ್ಷೆಯ ಉತ್ತರ ಕೀಲಿಗಳನ್ನು ಲಂಚದ ಪ್ರತಿಯಾಗಿ ಅಭ್ಯರ್ಥಿಗಳಿಗೆ ಒದಗಿಸಲಾಗಿತ್ತು ಎಂದು ಜಾರಿ ನಿರ್ದೇಶನಾಲಯ (ಇಡಿ) ವಿಶೇಷ ನ್ಯಾಯಾಲಯಕ್ಕೆ ತಿಳಿಸಿದೆ.
ಇಡಿ ತನಿಖೆಯ ಪ್ರಕಾರ, ಸಾಹುಕಾರ್‌ ಅವರು ಒಬ್ಬ ಅಭ್ಯರ್ಥಿಗೆ 10 ಲಕ್ಷ ಮುಂಗಡ ಹಣಕ್ಕೆ ಉತ್ತರ ಕೀ ಒದಗಿಸಿದ್ದರು ಎನ್ನಲಾಗಿದ್ದು, ಆ ಅಭ್ಯರ್ಥಿ ಬಳಿಕ ಮೂರನೇ ರ್ಯಾಂಕ್‌ ಪಡೆದಿದ್ದಾನೆ ಎಂದು ಆರೋಪಿಸಲಾಗಿದೆ. ಮತ್ತೊಂದೆಡೆ, ಗೀತಾ ಅವರು ಮೊದಲ ರ್ಯಾಂಕ್‌ ಪಡೆದ ಅಭ್ಯರ್ಥಿಗೆ 20 ಲಕ್ಷ ಮುಂಗಡ ಹಣದ ಪ್ರತಿಯಾಗಿ ಉತ್ತರ ಕೀಲಿಗಳನ್ನು ಒದಗಿಸಿದ್ದರು ಎಂಬ ಆರೋಪವನ್ನು ಇಡಿ ಮಾಡಿದೆ. ಇದೇ ರೀತಿಯಲ್ಲಿ ಇತರ ನಾಲ್ವರು ಅಭ್ಯರ್ಥಿಗಳಿಗೂ ಉತ್ತರ ಕೀಲಿಗಳನ್ನು ಒದಗಿಸಲು ವ್ಯವಸ್ಥೆ ಮಾಡಲಾಗಿತ್ತು ಎಂದು ತನಿಖಾ ಸಂಸ್ಥೆ ಹೇಳಿದೆ.
ಆರು ಅಭ್ಯರ್ಥಿಗಳಿಗೆ ಉತ್ತರ ಕೀ?
ಇಡಿ ನ್ಯಾಯಾಲಯಕ್ಕೆ ಸಲ್ಲಿಸಿರುವ ಮಾಹಿತಿಯ ಪ್ರಕಾರ, ಸಾಹುಕಾರ್‌ ಮತ್ತು ಗೀತಾ ಅವರು ಕನಿಷ್ಠ ಆರು ಅಭ್ಯರ್ಥಿಗಳಿಗೆ ಪರೀಕ್ಷೆಯ ಉತ್ತರ ಕೀಲಿಗಳನ್ನು ತಲುಪಿಸಿದ್ದಾರೆ ಎನ್ನಲಾಗಿದೆ. ಪರೀಕ್ಷಾ ನಿಯಂತ್ರಕರಾಗಿದ್ದ ಐಎಎಸ್‌ ಅಧಿಕಾರಿ ಜ್ಞಾನೇಂದ್ರ ಕುಮಾರ್‌ ಗಂಗ್ವಾರ್‌ ಅವರ ನೆರವಿನಿಂದ ಈ ವ್ಯವಸ್ಥೆ ನಡೆದಿದೆ ಎಂದು ಇಡಿ ಆರೋಪಿಸಿದೆ. ಗೀತಾ ಅವರು ಅಭ್ಯರ್ಥಿಗಳ ಹೆಸರು ಹಾಗೂ ರೋಲ್‌ ನಂಬರ್‌ಗಳನ್ನು ಗಂಗ್ವಾರ್‌ ಅವರಿಗೆ ನೀಡಿದ್ದು, ಪರೀಕ್ಷಾ ಕೇಂದ್ರದಲ್ಲಿ ಅವರ ಆಸನ ವ್ಯವಸ್ಥೆಗೂ ಅನುಕೂಲ ಮಾಡಿಕೊಡಲಾಗಿತ್ತು ಎಂದು ತನಿಖಾಧಿಕಾರಿಗಳು ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.
ಪರೀಕ್ಷೆಯಲ್ಲಿ ಒಟ್ಟು 100 ಪ್ರಶ್ನೆಗಳಿದ್ದರೂ ಕೆಲವು ಅಭ್ಯರ್ಥಿಗಳಿಗೆ 80 ಪ್ರಶ್ನೆಗಳ ಉತ್ತರಗಳನ್ನು ಮುಂಚಿತವಾಗಿ ನೀಡಲಾಗಿತ್ತು. ಅವುಗಳನ್ನು ನೆನಪಿಟ್ಟುಕೊಂಡು ಪರೀಕ್ಷೆ ಬರೆಯುವಂತೆ ಸೂಚಿಸಲಾಗಿತ್ತು ಎಂದು ಇಡಿ ವಾದಿಸಿದೆ. ತನಿಖೆಯಲ್ಲಿ ಕೆಲವು ಅಭ್ಯರ್ಥಿಗಳು ತಪ್ಪು ಉತ್ತರಗಳನ್ನೂ ಒಂದೇ ರೀತಿಯಲ್ಲಿ ನೀಡಿರುವುದು ಅನುಮಾನಕ್ಕೆ ಕಾರಣವಾಗಿದೆ ಎಂದು ಸಂಸ್ಥೆ ತಿಳಿಸಿದೆ.
30-40 ಲಕ್ಷಕ್ಕೆ ಪ್ರಶ್ನೆ ಪತ್ರಿಕೆ ಮಾರಾಟ:
ಈ ಪ್ರಕರಣದ ಆರಂಭಿಕ ತನಿಖೆಯಲ್ಲಿ, ಪಶುವೈದ್ಯಾಧಿಕಾರಿಗಳ 400 ಹುದ್ದೆಗಳ ನೇಮಕಾತಿ ಪರೀಕ್ಷೆಯ ಪ್ರಶ್ನೆ ಪತ್ರಿಕೆ ಸೋರಿಕೆ ಆರೋಪ ಪ್ರಮುಖವಾಗಿ ಕೇಳಿಬಂದಿತ್ತು. ಆಗಿನ ಕೆಪಿಎಸ್‌‍ಸಿ ಪರೀಕ್ಷಾ ನಿಯಂತ್ರಕ ಜ್ಞಾನೇಂದ್ರ ಕುಮಾರ್‌ ಗಂಗ್ವಾರ್‌ ಮತ್ತು ಮಧ್ಯವರ್ತಿ ಬಸವರಾಜ್‌ ಕನ್ನಾಳೆ ವಿರುದ್ಧ ಸಿಐಡಿ ಹಾಗೂ ಇಡಿ ತನಿಖೆ ನಡೆಸುತ್ತಿವೆ.
ಇಡಿ ಪ್ರಕಾರ, ಅಭ್ಯರ್ಥಿಗಳಿಂದ ಆರಂಭದಲ್ಲಿ ತಲಾ ಸುಮಾರು 80 ಲಕ್ಷ ಬೇಡಿಕೆ ಇಡಲಾಗಿತ್ತು. ನಂತರ ಮಾತುಕತೆಯ ಮೂಲಕ ಮೊತ್ತವನ್ನು 30-40 ಲಕ್ಷಕ್ಕೆ ಇಳಿಸಲಾಗಿತ್ತು. ಕೆಲವು ಅಭ್ಯರ್ಥಿಗಳಿಂದ ಮುಂಗಡ ಹಣವನ್ನು ನಗದು ಹಾಗೂ ಬ್ಯಾಂಕ್‌ ವಹಿವಾಟಿನ ಮೂಲಕ ಪಡೆಯಲಾಗಿದ್ದು, ಉಳಿದ ಹಣಕ್ಕಾಗಿ ಖಾಲಿ ಸಹಿ ಮಾಡಿದ ಚೆಕ್‌ಗಳು ಮತ್ತು ಪ್ರಾಮಿಸರಿ ನೋಟುಗಳನ್ನು ಪಡೆಯಲಾಗಿತ್ತು ಎಂದು ತನಿಖಾ ಸಂಸ್ಥೆ ಹೇಳಿದೆ.
ಇದಕ್ಕೂ ಮುನ್ನ ಇಡಿ, ಗಂಗ್ವಾರ್‌ ಅವರು ಮಧ್ಯವರ್ತಿ ಕನ್ನಾಳೆಗೆ ಪ್ರಶ್ನೆ ಪತ್ರಿಕೆಯನ್ನು ಪರೀಕ್ಷೆಗೆ ಒಂದು ದಿನ ಮುನ್ನ ಒದಗಿಸಿದ್ದರು ಎಂದು ಆರೋಪಿಸಿತ್ತು. ಗಂಗ್ವಾರ್‌ ಅವರಿಂದ ಕನ್ನಾಳೆಗೆ ಪ್ರಶ್ನೆ ಪತ್ರಿಕೆ ತಲುಪಿ, ಬಳಿಕ ಅಭ್ಯರ್ಥಿಗಳಿಗೆ ಹಣದ ಪ್ರತಿಯಾಗಿ ಪರೀಕ್ಷಾ ಸಾಮಗ್ರಿ ನೀಡಲಾಗಿತ್ತು ಎಂಬುದು ತನಿಖೆಯ ಪ್ರಮುಖ ಅಂಶವಾಗಿದೆ.
ಸಾಹುಕಾರ್‌, ಗೀತಾ ಅ.19ರವರೆಗೆ ಇಡಿ ವಶಕ್ಕೆ
ಈ ನಡುವೆ ಕೆಪಿಎಸ್‌‍ಸಿ ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್‌ ಹಾಗೂ ಸದಸ್ಯೆ ಬಿ.ವಿ. ಗೀತಾ ಅವರನ್ನು ಇಡಿ ಮಂಗಳವಾರ ಬಂಧಿಸಿದ್ದು, ಬುಧವಾರ ವಿಶೇಷ ನ್ಯಾಯಾಲಯದ ಮುಂದೆ ಹಾಜರುಪಡಿಸಿತು. ನ್ಯಾಯಾಲಯವು ಇಬ್ಬರನ್ನೂ ಅಕ್ಟೋಬರ್‌ 19ರವರೆಗೆ ಇಡಿ ಕಸ್ಟಡಿಗೆ ಒಪ್ಪಿಸಿದೆ. ಹಣದ ವಹಿವಾಟು, ಇತರ ಅಭ್ಯರ್ಥಿಗಳೊಂದಿಗೆ ನಡೆದಿರುವ ಸಂಪರ್ಕ ಹಾಗೂ ಲಂಚದ ಹಣದ ಜಾಡು ಪತ್ತೆಹಚ್ಚಲು ವಿಚಾರಣೆ ಮುಂದುವರಿಯಲಿದೆ.
