ಹಾಲಿನ ದರ ಏರಿಕೆ ಬೆನ್ನಲ್ಲೇ ಟೀ-ಕಾಫಿ, ತಿಂಡಿ-ತಿನಿಸುಗಳ ಬೆಲೆಯಲ್ಲಿ ಭಾರೀ ಏರಿಕೆ

ಬೆಂಗಳೂರು,ನ.8- ಹಾಲಿನ ದರ ಏರಿಕೆಯ ಬೆನ್ನಲ್ಲೇ ಹೋಟೆಲ್‌ಗಳಲ್ಲಿ ಟಿಫಿನ್‌, ಸಿಹಿತಿಂಡಿ ಹಾಗೂ ಪಾನೀಯಗಳ ಬೆಲೆಯೂ ಹೆಚ್ಚಳವಾಗಿದ್ದು, ಪರಿಷ್ಕೃತ ದರ ಭಾನುವಾರದಿಂದಲೇ ಜಾರಿಗೆ ಬಂದಿದೆ. ಈಗಾಗಲೇ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ತತ್ತರಿಸಿರುವ ಜನಸಾಮಾನ್ಯರಿಗೆ ಹೋಟೆಲ್‌ ತಿಂಡಿ-ತಿನಿಸುಗಳ ಬೆಲೆ ಏರಿಕೆ ಮತ್ತೊಂದು ಬೆಲೆ ಬಿಸಿಯನ್ನು ನೀಡಿದೆ.

ಹೊಸ ದರಪಟ್ಟಿಯಲ್ಲಿ ಸಾಮಾನ್ಯವಾಗಿ ಜನರು ಹೆಚ್ಚು ಸೇವಿಸುವ ಇಡ್ಲಿ, ದೋಸೆ, ವಡೆ, ಉಪಾ, ಬಿಸಿಬೇಳೆ ಬಾತ್‌, ಕಾಫಿ, ಚಹಾ ಸೇರಿದಂತೆ ಹಲವು ತಿಂಡಿ-ತಿನಿಸುಗಳ ಬೆಲೆ ಹೆಚ್ಚಿಸಲಾಗಿದೆ. ಸಿಹಿತಿಂಡಿ ಹಾಗೂ ವಿವಿಧ ಪಾನೀಯಗಳ ದರವೂ ಪರಿಷ್ಕೃತಗೊಂಡಿದೆ.ಹೊಸ ದರದ ಪ್ರಕಾರ ಅಕ್ಕಿ ಇಡ್ಲಿ ಒಂದು 70, ವಡೆ 90, ರವೆ ಇಡ್ಲಿ 125, ಖಾರಾಬಾತ್‌ 125, ಬಿಳಿ ಉಪ್ಮಾ 125, ಬಿಸಿಬೇಳೆ ಬಾತ್‌ 150, ಖಾರ ಪೊಂಗಲ್‌ 130, ಶ್ಯಾವಿಗೆ ಬಾತ್‌ 135, ಪೂರಿ ಎರಡು 145 ಹಾಗೂ ಬೋಂಡಾ ಸೂಪ್‌ 130ಕ್ಕೆ ದೊರೆಯಲಿದೆ.

ದೋಸೆಗಳ ದರವೂ ಗ್ರಾಹಕರ ಜೇಬಿಗೆ ಹೊರೆಯಾಗುವಂತಾಗಿದೆ. ಮಸಾಲಾ ದೋಸೆ 175, ಸರಳ ದೋಸೆ 170, ಪುಡಿ ದೋಸೆ 190, ರವೆ ದೋಸೆ 195, ರವೆ ಮಸಾಲಾ ದೋಸೆ 200, ರವೆ ಈರುಳ್ಳಿ ದೋಸೆ 200 ಹಾಗೂ ಖಾಲಿ ದೋಸೆ 150 ಎಂದು ಹೊಸ ದರಪಟ್ಟಿಯಲ್ಲಿ ನಿಗದಿಪಡಿಸಲಾಗಿದೆ.

ಕಾಫಿ 75, ಬೆಳ್ಳಿ ಕಪ್‌ನಲ್ಲಿ ಕಾಫಿ 80 ರೂ., ಚಹಾ 70 ರೂ., ಹಾಲು 65 ರೂ. ಮತ್ತು ಬಿಸಿ ಬಾದಾಮಿ ಹಾಲು 80 ರೂ.ಗೆ ಏರಿಕೆಯಾಗಿದೆ. ಬಾದಾಮಿ ಶೀತ 170 ರೂ., ದ್ರಾಕ್ಷಿ ರಸ 170 ರೂ., ಹಣ್ಣಿನ ಮಿಶ್ರಣ 215 ರೂ. ಹಾಗೂ ಐಸ್‌‍ಕ್ರೀಂ 140 ರೂ. ಎಂದು ದರ ನಿಗದಿಯಾಗಿದೆ. ಸಿಹಿತಿಂಡಿಗಳಲ್ಲೂ ಬೆಲೆ ಏರಿಕೆ ಕಂಡುಬಂದಿದ್ದು, ಕೇಸರಿಭಾತ್‌ 120, ಜಾಮೂನ್‌ 90, ಹಲ್ವಾ 120, ಚಂದ್ರಹಾರ 140 ಹಾಗೂ ದಮ್ರೂಟ್‌ 85 ರೂ.ಗೆ ಮಾರಾಟವಾಗಲಿದೆ.

ಇದರ ಜತೆಗೆ ್ಕ ವಿಶೇಷ ಊಟ 390ಕ್ಕೆ ನಿಗದಿಯಾಗಿದ್ದು, ಇದರಲ್ಲಿ ಜ್ಯೂಸ್‌‍, ಕೋಸಂಬರಿ, ತರಕಾರಿ ಕರಿ, ಸಾಗು, ಚಟ್ನಿ, ಪೂರಿ-ಮಸಾಲೆ ದೋಸೆ, ಸಿಹಿ, ವಡೆ, ಬಿಸಿಬೇಳೆ ಬಾತ್‌, ರೈಸ್‌‍ ಬಾತ್‌, ಪಾಪಡ್‌, ಉಪ್ಪಿನಕಾಯಿ, ಪಾಯಸ, ರೈಸ್‌‍, ರಸಂ, ಸಾಂಬಾರ್‌, ಮೊಸರನ್ನ ಮತ್ತು ಹಣ್ಣು ಸೇರಿದಂತೆ ವಿವಿಧ ಪದಾರ್ಥಗಳು ಒಳಗೊಂಡಿವೆ.

ಹಾಲಿನ ದರ ಏರಿಕೆಯಿಂದ ಹೋಟೆಲ್‌ಗಳ ವೆಚ್ಚ ಹೆಚ್ಚಾಗಿದೆ ಎಂಬ ಕಾರಣವನ್ನು ಮುಂದಿಟ್ಟುಕೊಂಡು ತಿಂಡಿ-ತಿನಿಸುಗಳ ದರ ಪರಿಷ್ಕರಿಸಲಾಗಿದೆ. ಆದರೆ ಇದರ ನೇರ ಹೊರೆ ಅಂತಿಮವಾಗಿ ಗ್ರಾಹಕರ ಜೇಬಿಗೆ ಬೀಳುತ್ತಿದೆ. ಬೆಳಗಿನ ಉಪಾಹಾರಕ್ಕೆ ಹೋಟೆಲ್‌ ಅವಲಂಬಿಸುವ ಉದ್ಯೋಗಿಗಳು, ವಿದ್ಯಾರ್ಥಿಗಳು ಹಾಗೂ ನಗರ ಪ್ರದೇಶದ ಸಾಮಾನ್ಯ ಕುಟುಂಬಗಳಿಗೆ ದರ ಏರಿಕೆ ಮತ್ತಷ್ಟು ಆರ್ಥಿಕ ಒತ್ತಡ ತಂದಿದೆ.

ಒಂದೆಡೆ ಹಾಲು, ತರಕಾರಿ, ಅಡುಗೆ ಎಣ್ಣೆ ಸೇರಿದಂತೆ ಅಗತ್ಯ ವಸ್ತುಗಳ ಬೆಲೆ ಏರಿಕೆ; ಮತ್ತೊಂದೆಡೆ ಹೋಟೆಲ್‌ ತಿಂಡಿ-ತಿನಿಸುಗಳ ದರ ಹೆಚ್ಚಳ. ಹೀಗಾಗಿ ಹಾಲಿನ ದರ ಏರಿಕೆಯ ಬಿಸಿ ಈಗ ಹೋಟೆಲ್‌ ತಟ್ಟೆಯಲ್ಲೂ ಕಾಣಿಸುತ್ತಿದೆ ಎಂಬಂತಾಗಿದೆ. ಜನಸಾಮಾನ್ಯರ ದಿನನಿತ್ಯದ ಖರ್ಚಿನ ಮೇಲೆ ಬೆಲೆ ಏರಿಕೆಯ ಸರಣಿ ಪರಿಣಾಮ ಮುಂದುವರಿದಿದ್ದು, ಸಾಮಾನ್ಯ ಉಪಾಹಾರವೂ ದುಬಾರಿಯಾಗುವ ಪರಿಸ್ಥಿತಿ ನಿರ್ಮಾಣವಾಗಿದೆ.