ಯುಜೀನ್ (ಅಮೆರಿಕ),ಆ.9- ವಿಶ್ವ ಅಂಡರ್-20 ಅಥ್ಲೆಟಿಕ್್ಸ ಚಾಂಪಿಯನ್ಶಿಪ್ನಲ್ಲಿ ಭಾರತದ ಬಸಂತ್ ಕುಮಾರ್ ಮೇಘ್ವಾಲ್ ಪುರುಷರ ಹೈಜಂಪ್ ಸ್ಪರ್ಧೆಯಲ್ಲಿ ವೈಯಕ್ತಿಕ ಶ್ರೇಷ್ಠ ಸಾಧನೆಯೊಂದಿಗೆ ಬೆಳ್ಳಿ ಪದಕ ಗೆದ್ದಿದ್ದಾರೆ. ಇದರೊಂದಿಗೆ ಚಾಂಪಿಯನ್ಶಿಪ್ನಲ್ಲಿ ಭಾರತದ ಪದಕಗಳ ಸಂಖ್ಯೆ ಎರಡಕ್ಕೇರಿದೆ. ರಾಜಸ್ಥಾನದ ಶ್ರೀಗಂಗಾನಗರ ಜಿಲ್ಲೆಯ ಗಡಿ ಪಟ್ಟಣ ಅನುಪ್ಗಢದ 19 ವರ್ಷದ ಮೇಘ್ವಾಲ್ನಲ್ಲಿ ನಡೆದ ನಾಲ್ಕನೇ ಹಾಗೂ ಅಂತಿಮ ಹಂತದ ಹಿಂದಿನ ದಿನದ ಸ್ಪರ್ಧೆಯಲ್ಲಿ 2.21 ಮೀಟರ್ ಎತ್ತರ ಜಿಗಿದು ಬೆಳ್ಳಿ ಪದಕ ತಮ್ಮದಾಗಿಸಿಕೊಂಡರು. ಇದು ಅವರ ವೃತ್ತಿಜೀವನದ ಅತ್ಯುತ್ತಮ ಸಾಧನೆಯಾಗಿದೆ.
ಅಲ್ಜೀರಿಯಾದ ಯೂನೆಸ್ ಅಯಾಚಿ ಚಿನ್ನದ ಪದಕ ಗೆದ್ದರೆ, ಗ್ರೇಟ್ ಬ್ರಿಟನ್ನ ಓಟಿಸ್ ಪೂಲ್ ಕಂಚಿನ ಪದಕ ಪಡೆದರು. ಮೂವರು ಪದಕ ವಿಜೇತರೂ 2.21 ಮೀಟರ್ ಎತ್ತರವನ್ನು ದಾಟಲು ಯಶಸ್ವಿಯಾದರೂ, 2.24 ಮೀಟರ್ ಎತ್ತರವನ್ನು ದಾಟಲು ನಡೆಸಿದ ತಲಾ ಮೂರು ಪ್ರಯತ್ನಗಳಲ್ಲೂ ವಿಫಲರಾದರು. ಹೀಗಾಗಿ ಹಿಂದಿನ ಎತ್ತರವನ್ನು ಎಷ್ಟು ಪ್ರಯತ್ನಗಳಲ್ಲಿ ಯಶಸ್ವಿಯಾಗಿ ದಾಟಿದರು ಎಂಬುದರ ಆಧಾರದ ಮೇಲೆ ಕೌಂಟ್ಬ್ಯಾಕ್ ನಿಯಮದಂತೆ ಸ್ಥಾನಗಳನ್ನು ನಿರ್ಧರಿಸಲಾಯಿತು.
ಅಯಾಚಿ 2.21 ಮೀಟರ್ ಎತ್ತರವನ್ನು ಮೊದಲ ಪ್ರಯತ್ನದಲ್ಲೇ ದಾಟಿದರೆ, ಮೇಘ್ವಾಲ್ ಎರಡನೇ ಹಾಗೂ ಪೂಲ್ ಮೂರನೇ ಪ್ರಯತ್ನದಲ್ಲಿ ಈ ಸಾಧನೆ ಮಾಡಿದರು. ಇದಕ್ಕೂ ಮುನ್ನ ಮೂರನೇ ದಿನ ನಡೆದ ಪುರುಷರ ಜಾವೆಲಿನ್ ಥ್ರೋ ಸ್ಪರ್ಧೆಯಲ್ಲಿ ಆಶಿಶ್ ಯಾದವ್ ಬೆಳ್ಳಿ ಪದಕ ಗೆದ್ದು ಭಾರತಕ್ಕೆ ಚಾಂಪಿಯನ್ಶಿಪ್ನ ಮೊದಲ ಪದಕ ತಂದುಕೊಟ್ಟಿದ್ದರು.
